Hepe sa TCPS gihulipan na

CEBU, Philippines - Gihulipan na sugod kagahapon sa buntag ang hepe sa kapolisan sa dakbayan sa Talisay nga si Superintendent Resty Santos, si Superintendent Reycel Carmelo Dayon kanhi Deputy City Director for Operation sa Cebu City Police Office maoy gihulip kaniya.

Si Santos mapasalamaton sa mga sakop niya sa Talisay City Police Station sa kooperasyon ngadto kaniya sa pagsumpo sa mga kriminalidad sa Talisay.

Si Santos nahimong hepe sa TCPS sulod sa siyam ka buwan ug nagpasalamat kang Mayor Johnny De los Reyes sa higayon nga gihatag ngadto kaniya.

Matud pa niya  nalipay siya nga sa iyang paglingkod sobra sa 70 porsiyento ang pagkunhod sa kriminalidad ang iyang nahimo ilabi na batok sa pagpanulis, kawat ug sugal. Sumala pa niya base sa crime statistics makita nga ang kapolisan sa Talisay wala magpabaya sa ilang trabaho.

Si Dayon nga nahinabi sa Banat News nagkanayon nga “consultative” ang pamaagi nga iyang himuon diin mokonsulta una siya sa katawhan nga girepresentahan sa mayor.

Usa sa nakitang paagi ni Dayon pagsumpo sa kriminalidad mao ang pagtabang sa siyudad  pagpahigayon og livelihood programs tungod kay sagad sa rason sa mga kriminal mao ang kawad-on.

Organisahon usab ni Dayon ang komunidad pinaagi sa mga tanod sa kabarangayan tungod kay nasayod siyang dako sila og matabang sa kampanya kontra krimen

Si Mayor Johnny De los Reyes nanghinaot nga ma-neutralize ni Dayon ang ilegal nga drugas ug uban pang krimen sa Talisay.

Samtang iya usab  gipasalamaton si Santos sa pagserbisyo niini sa siyudad ug sa pagsumpo sa kriminalidad. (BANAT NEWS)