Pagkasikop sa mga Tiamzon

CEBU, Philippines - Human sa hilom nga pagkasikop sa lider sa Communist Party of the Philippines nga magtiayong sila si Benito ug Wilma Tiamzon ang Banat News nakakuha og kasayoran kun giunsa sila pagkasikop.

Nasikop ang maong magtiayon niadtong Sabado sa hapon sa mga sakop sa Criminal Investigation and Detection Group national office, CIDG-7, Armed Forces of the Philippines Intelligence Unit ug sa Carcar City Police Station sa bukirang bahin sa barangay Zaragosa sa lungsod sa Aloguinsan niadtong Marso 22.

Ang duha sakay sa usa ka Hyundai Starex van nga color gray nga gisundan sa usa ka Toyota Innova nga miagi sa usa ka checkpoint sa barangay Valencia sa dakbayan sa Carcar.

Matud pa nga dihang nakabantay ang Toyota Innova nga gipangsikop ang sakay sa Starex mibalik kini sa agi apan nababagan na sa mga security forces. Nasikop sulod sa Starex van ang magtiayong Tiamzon, Joel Enano ang drayber, Rex Villafor ug ang usa ka babaye nga si Arlene Panea.

Samtang sakay sa Innova sila si Nona Castillo alyas Lorrainne drayber ug si Jeosi Nepa.

Narekober sa Hyundai nga Starex van ang usa ka caliber .45 nga may tulo ka magazine nga may 17 ka bala nga didto sa gilingkoran sa magti-ayong Tiamzon. Usa ka kalibre .9mm nga pistola usa ka magazine nga may pito ka bala.

Narekober sab ang duha ka granada sa glove compartment atubangan sa gilingkoran ni Villaflor.

Sa Toyota Innova, nakuha gikan ni Nona Castillo ang usa ka .9mm nga pistola nga may pito ka bala samtang .357 revolver nga may unom ka bala usab kang Nepa.

Human nga nasikop ang pito gidala kini sa kapolisan ug military ngadto sa AFP Central Command ug pagkaalas-10 sa buntag sa adlaw nga Domingo gisakay sila sa usa ka chartered flight pangadto sa kaulohan.

Ang duha nag-atubang og 15 counts of murder ug gi-isyuhan og warrant of arrest ni Executive Judge Ephrem Abando sa RTC Branch 18 sa Hilongos, Leyte.

 Sumala pa sa mga balita sa kaulohan, gikan pa sa La Union sa Luzon nasundan na sa security forces ang mga Tiamzon.

Ang mga abogado sa duha mihimakak nga dunay mga armas nga nakuha sa ilang mga kliyente.

Matud pa nila nga mga binuhing iring ug iro ray dala sa magtiayon atol sa pagdakop. (BANAT NEWS)