DENR mokiha g’yud sa mga namutol og kahoy sa Manipis
CEBU, Philippines - Gitataw sa kadagkoan sa Department of Environment and Natural Resources (DENR) nga kun mamatud-an nila nga nakahimo og salaod ang igsoon ni Talisay City Mayor Johnny V. De los Reyes dili sila magpanuko pagpasaka og sumbong kriminal batok kaniya.
Walo ka dagko nga punoan sa kahoy didto sa Sitio Campensa, Manipis, Talisay ang gipangputol nga wala’y pagtugot gikan sa DENR ug ang usa sa tawo nga mipaputol giingong igsoon sa mayor.
Si Eddie Llamedo, tigpamaba sa DENR, mibutyag nga sinsero ang ilang ahensya nga mopatuman sa balaod nga gilatid sa Presidential Decree 705, ang Forestry Law of the Philippines nga mosilot sa mga magpataka’g pamutol sa mga kahoy.
Usa ka Wilfredo de los Reyes ang apil sa giimbitar sa DENR nga patambongon sa hearing sa maong kaso karong sunod semana apan apan walay igsoon si Mayor JVR nga Wilfredo ang ngalan.
Gawas ni Wilfredo, ang ubang giimbitar alang sa husay mao sila si Manipis Konsehal Edward Abalo ug Antonio Jaberina; ang head teacher sa Manipis Elementary School nga si Roger Bajo; truck driver nga si Virgilio Bastida; chain saw operator nga si Marciano Simba ug laing usa ka Roldan Basamayor.
Napamatud-an sa DENR nga duna g’yuy mga dagko’ng kahoy nga Mahogany nga nagpanuigon na og kapin sa 20 ka tuig nga gipangputol duol sa tunghaan’g elementarya. (BANAT NEWS)
- Latest
