Skate park sa Lapu-Lapu mugnaon

CEBU, Philippines - Ang mga opisyal sa dakbayan sa Lapu-Lapu nagplano karon nga makatukod sila og skate park alang niadtong mga batan-on nga hilig sa maong sports. 

Gitoohan nga duol na ang katumanan sa maong tinguha human gipahigayon kagahapon ang ground breaking ceremony sa pagahimoon nga skate park nga adto ipahiluna sa Hoopsdome Lapu-Lapu.

Si Mayor Paz Radaza nagkanayon nga usa sa nakaaghat kaniya pagtukod og skate park mao si Dandoy Tongco nga usa ka International-renowned long boarder.

Nakadawat usab og feedbacks si Radaza nga daghang mga batan-on ang gusto sa maong sports hinungdan nga iya kining gipangitaan og lugar nga adto sila magbansay-bansay.

Si Tongco mapasalamaton kaayo sa mga opisyal sa Lapu-Lapu kay gihatagan g’yud sila og kahigayonan nga magkahiusa pinaagi sa skate park.

Matud ni Tongco nga ang skates dili lang alang sa kalalakin-an apan pwede usab kini sa kababayen-an.

Sama ni Atrea Ricablanca nga bisan og nasayod siya nga kuyaw ang maong duwa apan kay nahigugma siya sa Long Boarding mao nga padayon siya sa iyang hilig.

Nasayran nga tinguha sa Lapu-Lapu City nga mahuman ang maong proyekto sa dili pa ang fiesta sa dakbayan diin gigahinan kini og P2.5 milyones ang  phase 1 ug phase 2 sa Skate Park. (BANAT NEWS)