Mayor JVR milaban sa iyang igsoon nga gipasanginlang illegal namutol og kahoy

CEBU, Philippines - Si Talisay City Mayor Johnny De los Reyes midepensa sa iyang igsuon nga giingong nalambigit sa ilegal nga pagpamutol sa walo ka punoan sa Mahogany sa Sitio Campensa, Barangay Manipis.

Ang igsuon sa mayor nga si Joel De los Reyes mihimakak hinoon sa pasangil batok kaniya apan iyang giangkon nga miadto siya sa lugar aron mag-supervise sa gipahimo’ng water reservoir sa mayor nga kapahimuslan sa mga mag-uuma.

Atol sa sesyon sa City Council niadtong Martes, si Konsehal Antonio Bacaltos, tsirman sa committee on environment, mihimo og privilege speech kabahin sa giingong pagkalambigit sa igsuon sa mayor ug laing pito ka tawo sa pagpamutol og mga kahoy didto sa maong lugar nga kalapasan sa balaod sa kalikupan.

Matud sa mayor nga gilantugi niya ang iyang igsuon kabahin sa maong report apan wala kini moangkon nga nakahimo siya og kalapasan sa balaod.

Ang mayor nasagmuyo tungod kay wala siya giduol ug gipangutana ni Bacaltos kabahin sa mao nga isyu.

Niadtong Martes sa hapon ang mayor nagpadala og memorandum kang Bacaltos nga nagpahibawo sa konsehal nga gikan sa 20 ka quota sa job order (JO) workers para kaniya himoon na lang lima ang iyang quota sugod niadtong Martes.

Si Bacaltos nagkanayon nga posible’ng adunay kalambigitan sa iyang privilege speech ang pagkaltas sa gidaghanon sa quota sa iyang mga JO.

Matud sa konsehal nga igo lang siyang mipatuman sa iyang trabaho isip piniling opisyal sa siyudad.

Gibutyag ni Bacaltos nga ang kanhi kapitan sa Barangay Manipis nga si Leo Togonon maoy mipadangat og reklamo sa iyang buhatan kabahin sa pagpamutol og mga kahoy.

Si Togonon mao ang presidente sa Agri-based Rural Technology on Hilly Upland Resources (ARTHUR).

Ang lugar diin gipamutol ang mga kahoy naglakip sa Osmeña Reforestation Project nga usa sa karaan nga plantasyon nga nahimutang diha sa Manipis.

Si Bacaltos sa iyang bahin nagkanayon nga nalipay siya tungod kay ang Department of Environment and Natural Resources (DENR) miaksiyon dayon sa reklamo ug ang mga tawo nga nalambigit ila na nga gipatawag.

Matud sa konsehal nga wala siya magmahay sa iyang pagbulgar sa ilegal nga pagpamutol og mga kahoy sa Barangay Manipis.

Si Talisay City Administrator John Yre De los Reyes nga maoy in-charge sa mga JO nagkanayon nga nianang pagkahapon siya makahibalo kabahin sa pagkaltas sa quota para ni Bacaltos ug iya kining susihon.

Matud ni John Yre nga ang gibuhat ni Bacaltos dili na pagtabang sa mayor ug klaro nga duna na kini bulok-politika. (BANAT NEWS)