Yolanda gigamit sa smuggling?

CEBU, Philippines - Mitumaw karon ang pagduda nga gigamit sa smuggling activities sa Sugbo ang paghatud og ayuda alang sa reconstruction ug rehabilitation sa   mga lugar sa Eastern Visayas nga gikusokuso pag-ayo sa bagyong Yolanda sa miaging tuig.

Kini human gipugngan sa Bureau of Customs (BOC) sa Sugbo ang kargamento sa Royal Cargoes Inc. didto sa Mactan Cebu International Airport nga naka-consign sa usa ka kompaniya nga nalambigit sa Energy production nga gideklarar nga mga relief goods alang sa mga biktima sa bagyo sa Leyte kaniadtong unang semana sa Marso ning tuiga.

Sigun sa kasaligang tinubdan nga mihangyo nga dili magpaila nga ang maong kargamento mga energy-related equipment diay ug dili relief goods.

Namatud-an usab nga ang kargamento importable apan walay customs duties kon buhis ug walay tax exemption gikan sa Department of Finance (DOF).

Laing kargamento nga gipugngan gihapon sa Customs mao ang usa ka container nga donasyon nga may sulod nga upat ka minibus CCE Motors nga naka-consign sa "Guardians" nga dili usa ka Non-Government Organization (NGO) nga may katungod pagdawat og donasyon gikan sa laing lugar.

Kompleto man tuod ang mga papeles sa importasyon sa maong kargamento apan dili kini importable sanglit ang maong sakyanan pulos man mga right-hand-drive.

Ang tinubdan miingon nga gisusi kini karon ni Cebu Customs District Collector Reynaldo Almadin ang mao nga mga kargamento.

Apan dihang gikuhaan og pamahayag sa Banat News si Almadin, ang iyang chief of staff nga si Atty. Kenneth Kernn Sesante maoy iyang gitahasan sa pagtubag ug miingon nga wala sila’y kalabotan niini.

Gipasabot hinuon ni Sesante nga kun may kulang man nga dokumento ang mga nahisgutang kargamento, may 30 ka adlaw pa ang mga consignee aron makakompleto sa gikinahanglanon nga rekisitos.

Hinuon iyang gitataw nga sa higayon nga mapakyas kini sa pagsumiter sa nahisgutang mga dokumento sa naasoy nga kargamento human sa paglabay sa 30 ka adlaw, ideklarar kini sa Customs nga abandoned cargoes nga nagpasabot nga ang gobiyerno na ang manag-iya niini ug mahimo na kining malakip sa pagahimuong pagsubasta.  (BANAT NEWS)