LCPO ug BPPO maghiusa vs illegal fishing sa Danajon

CEBU, Philippines - Bisan pa gihulipan na si Sr. Supt. Rey Lyndon Lawas ni Sr. Supt. Armando Radoc isip OIC City Director sa kapolisan sa Lapu-Lapu padayonon gihapon ni Mayor Paz Radaza ang planong pakigtagbo sa Provincial Commander sa kapolisan sa lalawigan sa Bohol kalabot sa pagsumpo sa illegal fishing.

Matud pa ni Radaza iyang gihangyo si Lawas ug Radoc nga magtambayayong sa paghimo og lakang nga masumpo ang dynamite fishing sa tungatungang bahin sa Danajon bank duol sa isla sa Caubian ug Bohol. Matud pa kada adlaw dunay madungog nga buto sa dinamita sa maong kadagatan.

 Ang kapolisan, Bantay Dagat ug Philippine Coast Guard naglisod og gukod sa mga dinamitero kay motabok kini sa isla sa Bohol. Gumikan niini mas maayo kung magtambayayong ang kapolisan sa Lapu-Lapu ug Bohol sa pagsikop sa mga nalambigit sa illegal fishing. Usa sa gisugyot ni Lawas mao ang pagsusi kung hain mamalit og mga sagol sa paghimo og dinamita ang mga dinamitero aron kini masumpo ang pagpamaligya niini ngadto sa mga mananagat. Kahinumduman nga niadtong Pebrero 26 ning tuiga,  gilagdaan ang usa ka covenant nga magprotiher sa kinabuhi ug kinaiyahan ilawom sa kadagatan sa isla sa Mactan uban sa mga tag-iya og dive shops, dagkong hotels ug restaurant sa Lapu-Lapu.   (BANAT NEWS)