Correct si Gazmin: Nganong wala man mo-protesta ang mga militanteng grupo batok sa pagdaugdaog kanato sa China?

CEBU, Philippines - Dako ang katingala ni Defense Secretary Voltaire Gazmin nga sa isyu sa kasungian  panag-iya sa Spratlys, ang mga militanting grupo, ang mga aktibista, hilom kaayo. Apan kusganon kaayong miprotesta batok niining pakig-alayon sa atong nasud uban sa America.

Misupak sila niining bag-ong defense cooperation tali sa America ug sa atong nasud. It seems nga kun unsay mahitabo, dili sila buot nga panalipdan kita sa America. Kinsa, ug unsa man nga nasud ang gusto nila nga maoy manalipod kanato? Ang Russia? Ang China?

Sukad pa ni sa sinugdanan nga kining maong mga pundok, supak gyud sa tanang himoon sa America nganhi sa atong nasud, bisan kun kini makaayo kanato.

Di ko kasabut nga kontra gyud nila ang America. Matag karon ug unya, sa bisan unsa nga isyu nga may kalabutan ang America, mag-demonstrate dayon sila atbang sa US Embassy. Ambut ngano.

Apan, sa diha nga miangkon ang China nga ang kaislahan ug kadagatan sa Spratlys ila sa China, walay timik ang mga militanting grupo. Mora’g miuyon ug midapig sila sa China. Sa diha nga gipasiritan sa tubig ang atong mga mangingisda sa China, hilom kaayo ang mga aktibista. Ug sa dihang gibabagan sa ilang Coast Guard ang atong barko nga nagdala’g pagkaon alang sa mga Marines nga nadistino sa Ayungin Shoal, wala man moreklamo ang atong mga militanting grupo. Ngano man ni?

Unya, sa tuyo sa America nga motabang sila pagpanalipod kanato batok niining mga harassment nga gihimo sa China batok kanato, suko sila. Daku silang supak. Unsa man ni sila, hai man ni sila makapusta?

Nagkanayon si Gazmin: “Our problem is we keep on complaining about the Enhanced Defense Cooperation Agreement with the US. Why don’t we complain when the Chinese used water canons on us?

“We demonstrate against those who are helping us but we don’t demonstrate against those who are bullying us.”  Hain na man kono ang atong pagka-Filipino?

* * *

Pagkakaron, wala pay klaro kun nasanta na ba gayud sa hingpit ang rice smuggling. Tinguha sa atong mga mag-uuma nga masulbad na kining maong suliran. Gawas nga naghatag kini’g dakung kadaot direktamente sa mga mag-uuma, daku kini’g epekto sa ekonomiya sa atong nasud.

Giingon nga gikan sa tuig 2004 hangtud 2012, ang nawala nga revenue gumikan sa rice smuggling, mikabat og 88.2 bilyones pesos, ug sa mga tuig 2012-2013, laing 664 bilyones pesos ang wala makasulod sa nasudnong panudlanan.  Kadaghan ining kwartaha. Unya, gipakapinan pa nig oil smuggling. Nganong mora man og helpless ang atong gobyerno batok sa mga smuggler? Unsa man ning atong gobyerno ug mga smuggler, usa ra ni sila, hinungdan nga naglisud ta’g subay sa daang matuwid? (BANAT NEWS)