Tighimo og armas sa Danao gironda

CEBU, Philippines - Nasikop sa mga sakop sa PNP Regional Special Operations Group (RSOG)-7 ang usa ka lalaki nga tighimo og armas sa dakbayan sa Danao ug nasakmitan kini og mga armas ug kahimanan sa illegal niya nga trabaho.

Ang himoanan og armas sa 46-anyos nga si Roselito Gonzalez didto sa Barangay Cogon Cruz, dakbayan sa Danao gironda sa mga polis kaniadtong Domingo sa hapon.

Si Superintendent Rex Derilo, deputy chief sa Regional Intelligence Division (RID)-7, miingon nga ang suspetsado didto nanghimo og armas sa usa ka payag-payag layo sa iyang balay.

Matud ni Derilo nga nakadawat og kasayuran ang ilang buhatan sa illegal nga kalihokan ni Gonzalez hinungdan nga ila kining gisusi ug nasuta nga tinuod ang report.

Nasakmit gikan sa himoanan og armas ni Gonzalez mao ang duha ka Ingram machine pistol, usa ka sub-machine gun ug nagkalain-laing kagamitan paghimo og armas ug pyesa sa armas.

Si Gonzalez mitug-an nga ang pagpamuhat og magazine sa armas maoy iyang panginabuhian nga nakapa-eskwela sa iyang mga anak.

Matud hinoon ni Gonzalez nga wala niya tudloi ang iyang mga anak nga mosunod sa iyang lakang.

Dugang ni Gonzalez nga dili permanente ang iyang pagbuhat og magazine sa armas tungod kay moundang man siya kung adunay dakop.

Si Derilo miingon nga pasakaan nila og kaso’ng kalapasan sa Comprehensive Law on Firearms and Ammunitions si Gonzalez. (BANAT NEWS)