“No collection, no graduation policy” gibantayan

CEBU, Philippines - Ang Department of Education Cebu Province mipahimangno sa tanang tunghaan sa probinsiya  kalabot sa "no collection, no graduation" policy. Si DepEd-7 schools superintendent Dr. Arden Monisit miingon nga hugot gyud nila nga gidili ang pagpangolekta og graduation fees ning nagsingabot nga graduation exercises sa mga tinun-an.

Wala pa hinuoy nadawat nga reklamo ang ilang buhatan apan gipahibawo ni Monisit nga wala nay bayran ang mga ginikanan sa mga mogradwar nga mga tinun-an.

Ang Department of Education adunay gitagana nga P16 milyones nga pundo gikan sa Maintenance and Other Operating Expenses (MOOE) alang sa tag P250 nga gastohanan sa kada tinun-an nga mogradwar sa probinsiya.

“We have downloaded special funds the MOOE sa atong mga eskwelahan, naghatag ta nila og P250   per graduate mao nay atong gastuhon sa upcoming graduation exercises,” asoy pa ni Monisit

Giawhag usab niya ang publiko nga kun adunay reklamo labot niini pwede silang modangop o manawag mismo sa ilang buhatan aron mahatagan kini og aksyon.

Ang masakpan nga molapas sa DepEd  Order No. 9 series of 2013 mag-atubang og suspension o ba kaha ma-dismiss sa ilang serbisyo.

Mas gusto sa maong ahensya nga school uniforms na lang sa mga tinun-an ilang suoton sa graduation apan gitataw nila nga di sila makabuot sa desisyon sa mga ginikanan kun ganahan sila nga magtoga ang ilang anak.

Ang graduation exercise sa mga tunghaan sa probinsiya gitakda  karong Marso 31 hangtod sa Abril 3 apan nanawat ang DepEd og mga special  permit alang sa pag-usab og schedule ilabi na niadtong mga tunghaan nga naapektuhan sa bagyo nga wala makaabot sa required number sa school days nga 201.  (BANAT NEWS)