Labor group moduso og petisyon aron usbawan ang suholan sa CV
CEBU, Philippines - Gipaabot nga iduso karong semanaha diha sa Regional Tripartite Wages and Productivity Board-7 ang petisyon alang sa dugang suholan bisan pa man sa hingpit nga implementasyon sa P13/day Cost of Living Allowance niadtong Marso 21 sa tanang mamumuo sa Central Visayas.
Si Metudio Belarmino, tigpamaba sa Living Wage Coalition miingon nga moapelar unta sila ngadto sa National Wage and Productivity Commission aron mangayo og wage increase inay nga COLA.
Apan nasayod sila nga molanat pa og unom ka buwan una pa kini madesisyonan ug nagtuo silang mopabor lang gihapon kini sa management side o sa mga negosyante.
Matud ni Belarmino ang COLA di basic pay, ang COLA naaprubahan niadtong February 14 apan ang mga wage hike petitioners sama sa maong coalition ug Associated Labor Unions-Trade Congress of the Philippines misaway niini.
"There is no law that prohibit us to file another wage hike petition kay ang ilang gihatag sa mga workers kay COLA man. Di man salary increase," dugang pa ni Belarmino.
Ang kowalisyon gilangkoban sa 40 ka mga labor unions/organizations nga mi-file og dugang P132 matag adlaw nga suholan sa tanang mga mamumuo sa Central Visayas. Samtang ang Associated Labor Union-Trade Union Congress of the Philippines ( ALU-TUCP) misang-at usab og P90 nga wage hike kada adlaw. (BANAT NEWS)
- Latest
