Tungod sa balde crew milayat sa lantsa nalumos

CEBU, Philippines - Patay ang usa ka tripulante sa lantsa nga pasaheroan kay nalumos tungod lang sa balde nga natagak nga iyang gisuwayan og kuha samtang sila nagdagan sa tunga-tunga sa dagat pasado alas-10 sa miaging gabii sa lungsod sa Pilar.

Ang nalumos naila nga si Buena Patuar, 60,  crew   sa   M/B CA Junmar 2 nga molupyo sa Barangay Esperanza sa Pilar. Base sa imbestigasyon sa kapolisan nga si Patuar nanglimpyo sa  salog sa lantsa ug aksidente nga nahulog ang balde nga iyang gigamit.

Gipahibalo ni Patuar ang iyang kauban nga si Cemproso Itlanas bahin niini apan giingnan kining pasagdan nalang tungod kay maghimo nalang sila og lain apan gikatahong milayat sa dagat si Patuar aron kuhaon ang balde nga natagak.

Ang biktima nakit-an na lang sa iyang kauban nga crew nga naglangoy-langoy sa dagat mga 50 metros ang gilay-on gikan sa lantsa, hinungdan nga gibalikan kini sa mga kauban luwan sa usa ka liferaft aron kini kuhaon samtang nipadayon ang lantsa kay duol naman kini sa baybayon.

 Apan tungod sa kakusog sa sulog sa dagat ug gituohang gikapoy naunlod kini, dihang nakapaduol na ang lantsa milayat iyang mga kauban aron kini luwason apan nawad-an kini og panimuot dihang gikarga sa liferaft ug daling gidala sa health center sa Pilar ug didto gideklarar nga patay na  ni Dr. Eufemia Maratas. (BANAT NEWS)