Gikomedyahan nga nakauyab og bayot nanunggab
CEBU, Philippines - Tawo nga gikomedyahan nga nakauyab og bayot nasuko ug nanunggab sa duha niya ka higala didto sa Sitio Marpa, Barangay Bakilid, dakbayan sa Mandaue.
Ang nanunggab mitug-an sa kapolisan nga ang iyang ngalan mao si JLM nga sa tinuod niyang binunyagan mao ang Just Love Me, ug ang apelyedo Kelong-kelong, 22, nagpuyo gihapon sa Barangay Bakilid.
Ang gidunggab ni JLM mao sila si Jennel Sibal, 32, ug Ian Pilapil, 23, pulos ulitawo nga gidala dayon sa Vicente Sotto Memorial Medical Center (VSMMC) nga nag-agulo sa kasakit sa ilang samad.
Ang biktima nga si Sibal nakaangkon og dinunggaban sa buko-buko ug si Pilapil nasamad usab sa iyang bukton kay gisagang niya ang mga dunggab sa suspetsado.
Si SPO1 Michael Limalima, sakop sa Presinto 2 sa Mandaue City Police Office (MCPO), miingon nga gikumedyahan lang ni Pilapil ang suspetsado nga nakauyab kini og bayot.
Matud ni SPO1 Limalima nga pwerte’ng sukoa ni JLM sa mao nga komedya nga nakauyab siya’g bayot ug misangko kini sa mainiton nila nga panaglalis.
Si Sibal nga nakapaminaw sa panaglalis, nagdali pagpaduol ug mitimang nga nakapasamot sa kasuko sa suspetsado hangtod nga mikuha kini og kutsilyo ug gipanunggab ang mga biktima.
Ang suspetsado nga nadakpan dayon sa kapolisan gibalhog na sa sulod sa detention cell ug pasakaan karong adlawa og kaso. (BANAT NEWS)
- Latest
