Hiniusang tigum para pagtukod sa merkado sa Talisay gisugyot

CEBU, Philippines - Adunay sugyot nga ang mga opisyal sa “Executive ug Legislative departments” sa dakbayan sa Talisay magtagbo aron ilang hisgutan ang katukoran sa dakung merkado publiko sa Barangay Tabunok.

Si Konsehal Doroteo Emit, tsirman sa Committee on Labor, Trade and Industry, nagkanayon nga kinahanglan nga mohimo sila og “parallel deliberation” sa multi-million loan alang pagtukod sa merkado.

Sa iyang suwat nga gipadala ni Mayor Johnny Delos Reyes, si Emit nagkanayon nga ang katukoran sa bag-ong merkado usa ka dakung proyekto mao nga nagkinahanglan kini og igo nga preparasyon ug pagtuon aron ang trabaho adunay sistema.

Ang kagamhanan sa Talisay buot nga mohuwam og P387 milyones sa bangko alang sa pagtukod og bag-ong merkado sa Tabunok.

Si Bise Mayor Romeo Villarante nagkanayon nga ang konseho sa Talisay motabang aron mapatuman dayon ang proyekto apan kinahanglang mosubay usab sa legal nga mga pamaagi.

Matud ni Villarante nga ang konseho sa Talisay nagmugna na og komitiba alang sa pagtoon kabahin sa multi-million loan gikan sa banko.

Ang mayor mimando na sa bise mayor ug Konsehal Danny Caballero nga maoy tsirman sa Committee on Market ug ni Konsehal Emit pagsumitir og report kabahin sa market development plan sulod sa 15 ka adlaw. Buot sa mayor nga si Villarante, Caballero ug Emit mosumitir sa ilang evaluation report ug comparison sa ubang mga pagtuon sa dili pa ang final deadline nga gihatag kanila.

Apan matud ni Emit nga ang tagal nga gihatag sa mayor kanila alang sa pagtuon sa proyekto ug sa strategic plan mubo ra kaayo ug maglisud sila pagtuman mao nga misugyot siya nga adunay hiniusa nga tigum  tali sa mga opisyal sa executive ug legislative departments.  (BANAT NEWS)