Mga enforcer sa Talisay dili kasakmit og lisensya
CEBU, Philippines - Ang mga traffic enforcers sa dakbayan sa Talisay dili gayud makasakmit og lisensya sa mga drayber nga ilang masakpan nga nakahimo og kalapasan sa tukmang lagda pagmaneho’g sakyanan.
Ang rason niini mao nga dili moisyu ang Land Transportation Office (LTO) og Temporary Operator’s Permit (TOP) ngadto sa mga traffic enforcers sa Talisay kay pulos sila “Job Order†employees.
Ang mga job order nga kawani wala’y “employee-employer agreement†aron mahimo sila nga magukod kun mohimo’g mga lakang nga supak sa balaod. Si Bise Mayor Romeo Villarante nga maoy pangulo sa City of Talisay-Traffic Operation Development Authority (CT-TODA) mibutyag nga gipahibalo sila sa LTO nga ang mga JO workers dili maisyohan og TOP.
Ang katugotan sa LTO nga maisyohan og mga TOP kadto ra’ng mga regular ug casual nga mga kawani. Adunay mga 80 ka sakop ang CT-TODA ug ang tanan kanila nakatambong na unta og seminar sa LTO kabahin sa ilang trabaho.
Matud usab ni Bise Mayor Villarante nga labing maayo unta nga makaisyu g’yud og TOP ang mga traffic enforcer aron madisiplina ang mga drayber nga badlongon.
Nabantayan nga daghang drayber og pasaheroang jeep nga badlongon ug anha mohunong sa lugar nga gideklarar nga “No Stopping†og maglingog-lingog lang bisan og napagaw na huyop sa ilang peto ang traffic enforcer. Ang Talisay nagpahimo na karon og Traffic Citation Ticket aron maisyuhan ang mga drayber nga makalapas sa balaod sa trapiko apan ang problema kay dili masakmit ang lisensya pinaagi lang sa citation ticket.
Pagkakaron kun adunay mga drayber nga angayan’g isyuhan og TOP kay mga badlongon ang mga enforcers manawag lang og polis nga may TOP. (BANAT NEWS)
- Latest
