Babaye naghikog human magkalalis sa kapuyo

CEBU, Philippines - Usa ka 21-anyos nga babaye naghikog pinaagi sa paghigot og straw sa iyang liog hangtod nga siya namatay sulod sa giabangan niini nga balay didto sa Barangay Pulpogan, Consolacion kaniadtong Biyernes sa kaadlawon.

Si Meldy Sondo, taga Barangay Casili, patay na nga napalgan sa iyang kapuyo nga si Brian Undag, 28, lumad nga taga dakbayan sa Oroquita sa Mindanao. Matud ni PO1 Socrates Borinaga, sakop sa Consolacion Police Station, nga si Sondo ug Undag nagkalalis sa wala pa niini mapalgi ang lawas sa babaye. Si Undag misaysay nga human sa ilang panaglalis natulog lang siya kay wala siya magtoo nga buhaton ni Sondo ang pagpakamatay.

Apan matud ni Undag nga nahingangha na lang siya kay sa iyang paghigmata mga ala- una sa kaadlawon nakita niya nga nagbitay na ang iyang kapuyo ug patay na.

Si PO1 Borinaga miingon nga gisugyot sa kapolisan sa kabanayan sa biktima nga ipahiling kini og medico-legal officer aron pagsuta kun wala ba gituyo ang iyang kamatayon.

Pinaagi sa pagpahigayon og autopsy ang medico-legal officer masayod kun ang namatay gituyo ba sa pagpatay.  (BANAT NEWS)