LBC gitulis na sab

CEBU, Philippines - Wala pay usa ka buwan human sa nahitabong pagpanulis sa LBC outlets sa dakbayan sa Sugbo ug Mandaue, laing outlet na usab sa maong remittance center ang gitulis sa wala mailhing mga tulisan sa P. Rodriguez St., Barangay Libertad, Bogo City kagahapon sa buntag.

Ikatulo na kini nga higayon nga gitulis ang samang outlet tungod gihapon sa kakuwang sa security system matud ni Sr. Supt. Noel Gillamac, Cebu Provincial Police Office Director.

Sa imbestigasyon sa Bogo City police, upat ka mga lalaki ang miabot sa maong outlet diin usa kanila ang armado og .38 revolver ug nagpakaaron ingnon nga kustomer apan kalit lang kining mideklarar og tulis.

Nadala sa mga tulisan ang P70,000 nga kita niini, mobile phone nga P7,000, ug pocket wifi sa usa sa mga empleyado.

“Nisulod ang duha pero sa akong tan-aw dunay gapabilin sa gawas back-up,” matud ni Chief Insp. Hermano Mallari, Bogo City police chief.

Daling misibat ang mga tulisan sakay sa managlahing Honda XRM motorcycles nga wala’y plaka paingon sa amihanang Sugbo.

Matud ni Mallari nga dunay mipahibalo kanila kabahin sa pagpanulis hinungdan nga mihimo gilayon sila og hot pursuit operation hangtud sa lungsod sa Medellin apan pakyas sila sa pagsikop sa mga tulisan. Miangkon si Mallari nga aduna sila’y gi-hold nga duha ka mga nagmotor apan sa dihang gidala nila kini sa LBC outlet aron ipa-identify ang empleyado mibalibad.

“Gi-hold lang una namo pero dili man kuno to mao kay posible pag-agi sa mga tulisan dunay gasunod nga laing gamotor mao to among na-intercept,” sigon ni Mallari nga midugang nga dili taga-Bogo ang mga tulisan kay wala kini magsul-ob og bonnet. Ang kapulisan nakig-coordinate na karon sa kadagkuan sa LBC aron sa pagkuha og kopya sa CCTV camera sa maong buhatan.  Matud ni Gillamac nga ang mga remittance centers humok gyud kaayong tulison kay way mga gwardiya.

“Wala gihapon sila’y security guard same with the other LBC branches unya ga-rely lang sa CCTV unya dili mana ma-extract dayon ang footages unsaon namo pag-intercept,” matud ni Gillamac.

Bag-uhay lang ang LBC outlet sa Barangay Tabok, Mandaue City gitulis sa duha ka mga lalaki sulod lamang sa duha ka minutos, paglabay og duha ka adlaw,  laing LBC outlet na usab sa Barangay Taboan, Cebu City ang gitulis ug nadala ang P42,000 nga kita niini sa mga armadong tawo. (BANAT NEWS)