13-anyos gusto’ng mag-bombero kay naugdaw ilang balay sa Lorega

CEBU, Philippines - Kun kaniadto iyang giambisyon nga mamahimong piloto ug masulod sa Philippine Air Force, ang dakong sunog sa ilang dapit maoy nakapausab sa panglantaw sa 13-anyos nga usa sa nasunogan sa barangay Lorega-San Miguel ning dakbayan sa Sugbo, gusto niyang mahimong bombero.

Si Patrick Oblianda nga taga sitio Itomyuta, gikatakdang mo-graduate sa Zapatera Elementary School karong Abril 3 ug bisan naapil og kasunog ilang balay uban sa ilang mga gamit, desidido siyang mobalik sa klase karong adlawa.

Gibanabanang 500 ka balay gikan sa walo ka mga sitio ang gilamoy sa kalayo  niadtong adlaw nga Martes. Pinuy-anan kini sa siete mil ka mga tawo, lakip ang pamilyang Oblianda.

 Si Patrick nagduwa sa usa ka internet café nianang panahona ug daling migawas aron tabangan makahikling sa luwas nga lugar ang iyang inahan nga unom ka buwang mabdos.

Iyaha usab gidala ang iyang mga igsuon ug human masigurong nakagawas na ang tanang sakop sa ilang pamilya una pa siya migawas. Ang ilang ama-ama atoa sa trabahoan atol sa pagkahitabo, ug siya ray gisaligan sa mga igsuon tungod kay siya may kamaguwangan.

Matud pa niya nga gusto pa unta siyang mobalik sa sud sa ilang balay aron  kuhaon ang ilang mga uniporme, sapatos ug gamit sa eskuylahan. Naguol siyang naapil og kasunog ang iyang projects sa finals, hinuon dako kaayo ang iyang pasalamat nga gisabot sa ilang mga magtutudlo ang sitwasyon.

“Gusto ko ma-bombero aron wala na’y sunog. Ang problema nila ato kay wa man sila (bombero) mosud. Naa ra sila sa gawas,” matud pa niya sa The FREEMAN.

Bisan wa silay nasalbar nga mga gamit, si Patrick miingon nga dunay miingon kanila nga hatagan sila og relief goods ug educational supplies karong adlawa. Ang iyang pamilya naa karon magpasilong sa Zapatera Gym.

Human sa sunog mibalik dayon siya sa kanhi gitarukan sa ilang balay aron panguhaon ang mga scraps nga mahimo pa nilang mabaligya sa junkshops.

Matud niya nakahalin siya og P400 ug gihatag niya ang P100 kay iyaha kining ipalit og mga sinina. Wa hinuon maapil og kaabo ang iyang pangandoy makahuman og eskuyla, kay matud niya tinguha niyang humanon ang elementary dayon mo-enroll siya sa Abellana National High School ug motungha sa kolehiyo. (BANAT NEWS)