Barangay assembly kinahanglan g’yud

CEBU, Philippines - Gipahimangnaon sa Department of Interior and Local Government (DILG) ang mga opisyal sa kabarangayan sa pagpahigayon g’yud og Barangay Assembly Day karong Marso 29.

Nag-una sa ipatuki sa DILG mao ang isyu sa kaandam sa kabarangayan panahon sa katalagman, ang paghipos sa basura, kahimtang sa kahusay ug kalinaw labi na ang problema sa ilegal nga drugas ug hugot nga pagpatuman sa Anti-Human Trafficking diha sa barangay.

Base sa Memorandum Circular nga gipirmahan ni Secretary Mar Roxas, ang tanang barangay sa tibuok nasud gimandoan sa pagpahigayun sa State of Barangay Address (SOBA) diin ilang ipadayag ang mga nahimo nila sa tibuok tuig 2013, ang kahimtang sa panudlanan ug mga plano karong tuiga. Ang mga barangay mahimo usab makapahigayon og medical ug dental mission, tiangge, ug uban pa nga makapapundok sa katawhan.

Kadtong mga opisyal sa barangay nga mapakyas pagpahigayon sa Barangay Assembly mapasakaan og kaso ni bisan kinsang moreklamo adto sa konseho sa lungsod o siyudad. (BANAT NEWS)