Si Bacaltos gihapon ang giila nga acting president sa Talisay College

CEBU, Philippines - Si Talisay City College Acting President Richel Bacaltos mao gihapon ang giila sa Board of Trustees (BOT) nga acting president sa tunghaan.

Karong adlawa, ang BOT magtigum adto sa Commission on Higher Education (CHED).

Si Talisay City Schools Division Superintendent Woodrow Denuyo nga maoy secretary sa BOT mipadala na og sulat-awhag sa tanang sakop sa TCC-BOT aron sila makatambong sa tigum.

Si Mayor Johnny De los Reyes nga maoy tsirman sa BOT mikompirma nga motambong siya sa tigum. Isip tsirman sa TCC-BOT ang mayor maoy modumala sa panagtigum.

Matud pa nga ang hisgutan sa tigum karong hapon mao ang kabahin sa “confirmation sa degrees, titles” ug diploma sa mga mogradwar karong tuiga ug ang paghatag og katungod sa acting president nga si Bacaltos nga mokompirmar sa mga college graduate. Si Bacaltos usab miingon nga nakadawat siya og notisya sa ipahigayong tigum sa Board nga adto ipahigayon sa buhatan sa CHED sa Barangay Lahug. Matud ni Bacaltos nga mawagtang na unya ang gibating kahingawa sa 726 ka estudyanteng mogradwar.

Ang sitwasyon karon sa TCC mao nga duha ang naglingkod nga presidente nga mao sila si Bacaltos ug si Paulus Cañete. Si Bacaltos tinudlo pa sa kanhi mayor samtang si Cañete tinudlo ni Mayor JVR.

Gikataho gani nga magpahigayon og duha ka buwag nga graduation rites sila si Cañete ug Bacaltos.

Si Bacaltos miangkon nga dili siya doctorate degree nga usa sa rekisitos nga gikinahanglan isip college president apan haum siya sa posisyon tungod kay acting capacity lang siya ug mokanaog siya kun duna nay matudlo ang BOT nga permamenteng college president. (BANAT NEWS)