Lorega gideklarar na nga ubos sa State of Calamity

CEBU, Philippines - Ang dakbayan sa Sugbo makagamit na karon sa iyang Calamity Budget aron gastohon pagtabang sa kapin sa 7,000 ka biktima sa sunog sa Barangay Lorega-San Miguel.

Gideklarar kagahapon sa Cebu City Council ang Barangay Lorega-San Miguel nga ubos sa State of Calamity human aprobahi ang resolusyon nila ni Konsehal Dave Tumulak ug Gerardo Carillo. Kun madeklarar na  ang usa ka dapit nga State of Calamity ang kagamhanan makahimo na paggasto sa iyang Calamity Budget nga dili na kuti ang pagkuha og mga dukomento.

Ang dakbayan sa Sugbo migahin og kapin sa P200 milyones nga Calamity Budget karong tuiga ug ang 30 porsiyento niini gamiton sa pagtabang sa mga biktima sa katalagman ug ang 70 porsiyento alang sa calamity preparedness. Giawhag ni Tumulak ang dinalian nga re-blocking sa nasunogan nga bahin sa Barangay Lorega-San Miguel aron maklaro ang karsada nga maagian sa mga bombero kun adunay sunog.

Nakabantay si Tumulak nga adunay mga karsada sa Lorega-San Miguel, usa niini ang nahimutang kilid sa karaang ihawan, gitukoran na og mga balay mao nga ang mga bombero wala na makasulod aron unta sayon ra ang pagpawong sa kayo.

Miawhag si Tumulak sa mga sakop sa Cebu Contractors’ Association nga motabang sa pagpahigayon og reblocking.

Sa laing bahin, si Konsehal Dizon miawhag usab sa kadagkoan sa National Housing Authority (NHA) nga tabangan ang mga biktima sa Barangay Lorega-San Miguel.

Matud ni Dizon nga kaniadto ang NHA mihatag og P5,000 nga hinabang ngadto sa mata’g pamilya nga nasunogan. (BANAT NEWS)