Duha ka kawani sa ihawan ‘adik’
CEBU, Philippines - Laing duha ka mga empleyado sa Cebu City Hall ang nasakpang positibo sa paggamit og illegal nga drugas human sa surprisang drug test nga gipahigayon kagahapon sa mga sakop sa City Office for Substance Abuse Prevention (COSAP).
Ang pangulo sa COSAP nga si Dr. Alice Utlang nagkanayon nga ang duha ka mga empleyado naggikan sa Abattoir Operations Division (AOD) sa Department of Veterinary Medicine and Fisheries (DVMF).
Si Utlang nagkanayon nga ang duha, kansang mga ngalan iyang gipugngan, apil sa napu ka empleyado sa AOD nga ilang gipailawom sa random ug surprise drug test kagahapon sa buntag.
Laing napulo usab ka empleyado sa Division for the Welfare of the Urban Poor (DWUP) apan wala pa’y resulta nga gibutyag si Utlang.
Una nang nagpahigayon og random drug testing ang COSAP sa mga empleyado sa Disaster Risk Reduction and Management Council nga gipangulohan ni Konsehal David Tumulak miaging Pebrero ug usa sa napulo ka empleyado ang positibo sa gidiling drugas.
Ang COSAP nagpahigayon usab samang drug test sa mga barangay ug pito na ka barangay ang ilang napailawom niini. (BANAT NEWS)
- Latest
