Nakapusil gikiha na

CEBU, Philippines -  Tawo nga naangol ug giingon nga maoy nakapatay sa iyang higala atol sa ilang pagpinusilay didto sa Barangay Pulpogan, Consolacion kaniadtong Marso 13 gipasakaan na og kaso sa kapolisan.

Si Vincent Vivar, 37, nga nagpuyo sa Barangay Pulpogan gidakop sa kapolisan didto sa tambalanan nga gidad-an kaniya tungod kay ang mga saksi mitumbok g’yud kaniya nga maoy nakapatay ni Allan Peter Ibalan.

Matud ni PO2 Glenn Burlas, sakop sa Consolacion Police Station, nga una nga na-report nga ang duha gipangpusil sa wala hiilhi nga tawo ug misangpot sa pagkamatay sa 37-anyos nga si Ibalan, taga Barangay Pitogo.

Si PO2 Burlas nagkanayon si Vivar nga nagpaalim sa iyang samad pinusilan gitumbok sa mga saksi nga maoy gikapinusilay sa namatay nga si Ibalan.

Ang mga saksi mitug-an sa kapolisan nga walay laing tawo nga namusil nila ni Vivar ug Ibalan sukwahi sa unang gikataho nga adunay laing tawo nga mipusil kanila.

Matud ni PO2 Burlas nga wala pa nila masuta kun ngano nga nagpinusilay ang duha. Sanglit murder man ang gipasaka nga kaso batok ni Vivar, dili siya makabutang og pyansa.  (BANAT NEWS)