Labor group mangayo g’yud og usbaw sa sweldo

CEBU, Philippines -  Ang kadagkoan sa Alliance of Progressive Labor mitakda nga moapelar karong adlawa adto sa National Wages and Productivity Commission kabahin sa pagbasura sa ilang gidemanda nga usbaw sa suholan sa mamumuo.

Ang Regional Tripartite Wages and Productivity Board mibasura sa gidemanda nga usbaw sa sweldo ug ang gimando mao ang paghatag og P13 nga Cost of Living Allowance sa mga nagsweldo lang base sa minimum wage.

Si Jose Tumungha nga maoy presidente sa APL miingon nga mihimo sila karon og subsob nga signature campaign sa ilang mga miyembro aron makapirma sa ilang pag-apelar sa NWPC.

Matud ni Tumungha nga ang APL ug ang Living Wage Coalition moinsister g’yud nga dili makatarunganon ang pagbasura sa RTWPB-7 sa ilang wage increase petition.

Kini ilabi na nga misaka pag-ayo ang prisyo sa nag-unang palaliton ug ingon man sa nag-ung-ong nga petisyon sa usbaw sa minimum nga pletehan sa PUJ gikan sa P7.50 ngadto na sa P10.00.

Gikabalak-an nga makaapektar kini sa panginabuhian sa yanong mga mamumuo dinhi sa Central Visayas.

Matud ni Tumungha nga sa higayon nga ibasura lang gihapon sa NWPC ang ilang pag-apelar, ang katapusang lakang ilang himoon mao na ang pag-refile og laing petisyon sa usbaw sa sweldo sa mga mamumuo. (BANAT NEWS)