‘Salintubig’ gipatuman sa Tuburan

CEBU, Philippines - Gitug-an sa Department of Health (DOH-7) nga nakatabang sa pagkontrolar ug hingpit nga nakawagtang sa kagaw sa tipos ang bag-ong tinubdan sa tubig  sa mga taga barangay Montealegre lungsod sa Tuburan.

Sigon pa ni Renan Cimafranca sa Regional Epidemiology and Surveillance Unit (RESU-7) nga ang mga opisyal sa naasoy nga lungsod nangita og laing alternatibong tubod sa tubig ug gipadagayday kini pinaagi sa mga tubo gikan sa laing barangay aron pagseguro nga limpyo kini.

Iyang gipahibawo nga ang maong proyekto giabagan usab sa programa sa Department of Interior and Local Government (DILG) ug sa DOH nga gitawag og “SALINTUBIG Grants” nga gitagana niadtong  mga lugar nga way water system ug mahatagan og pundo alang niini sa labing daling panahon.

Apan gitataw ni Cimafranca nga dili tanang mga lugar nga gihugpaan og mga sakit sama sa tipos, diarrhea ug uban pa ang mahatagan niini sanglit mag-agad kini sa mga hingtungdang mga LGUs.

Gipahibawo usab ni Cimafranca nga ang iyang mga tawo nibiya na sa barangay Montealegre niadtong niaging semana tungod kay nakagawas na man ang tanang mga nabiktima sa tipos gikan sa tambalanan.

Wala na usab silay bag-ong natala nga nasakit niini ingon man sa kasikbit niining barangay. Giingon nga ang atabay nga maoy kuhaanan nila og tubig kaniadto maoy gidudahang natakboyan sa maong kagaw. Gipahibawo hinuon niini nga ila gihapon nga gitambagan ang mga residente sa naasoy nga dapit nga i-chlorinate gyud ang tubig niini ngadto sa ilang tagsatagsa ka mga balay sa dili kini hingpit nga imnon.(/EIM)(BANAT NEWS)