Gibuwagan migulgol sa liog

CEBU, Philippines - Usa ka 16-anyos nga dalagita nga mogradwar na unta sa high school karong tuiga naggulgol sa iyang liog human wa mopakita ang mibuwag kaniya nga iyang uyab diha sa Sitio Bung-aw, Barangay Poblacion, Santander.

Ang maong tinun-an kansang pangalan gipugngan sa Banat News molupyo sa Sitio Takuling, Barangay Mainit sa lungsod sa Oslob ug nagtungha sa usa sa mga high schools sa maong lungsod.

Nagtuo ang kapolisan nga wala kini maglumos sa iyang kaugalingon aron maghikog kay base sa ilang pagsusi sa lawas duna kini dakong laslas sa iyang liog nga nakaingon sa iyang kamatayon.

Base sa pagsusi sa kapolisan, ilang nahibaw-an nga  bag-ohay lang kining gibuwagan sa iyang uyab usa ka semana na ang nakalabay ug gidudahang wala kini makadawat sa nahitabo kaniya.

Matud pa nga dunay mga residente sa maong lugar ang nakakita sa dalagita nga nagpunay og panguros ug abi lang nila nga maligo ra kini sa dagat. Apan sa sunod nilang pagkakita niini, naglutaw na kini nga wala nay kinabuhi.

Si PO3 Catherine Gumagay, Women’s and Children’s Protection Desk officer sa maong lungsod miingon nga base sa ilang imbestigasyon daw giplano na gyud sa dalagita nga magpakamatay. Nagtuo siyang gigulgol sa dalagita iyang liog samtang diha sa tubig.

Matud pa nga kapin usa ka tuig na ang dalagita ug ang uyab niini sa ilang relasyon.

Dugang pa ni Gumagay mi-text ang dalagita sa lalaki nga magkita silang duha sa sitio Bung-aw diin kini napalgang patay, apan sa wala masayring hinungdan wala moadto ang lalaki.

Girekomendar hinuon sa kapolisan nga ipailawom sa awtopsiya ang lawas sa dalagita aron masusi kung unsay gikamatyan niini. (/EIM)(BANAT NEWS)