Nagduwa’g armas naunay, patay
CEBU, Philippines - Namatay ang usa ka 18-anyos nga Bol-anon kay naunay sa kaugalingon niyang armas nga iyang giduwa-duwaan didto sa Sitio Looc, Barangay Maribago, dakbayan sa Lapu-Lapu kaniadtong Sabado sa gabii.
Ang namatay nailhan lang sa ngalan nga Marlon, lumad nga taga Ubay, Bohol ug bag-o pa nga nag-abang og balay didto sa Sitio Looc.
Si SPO3 Winston Ybañez sa Homicide Section sa Lapu-Lapu City Police Office (LLCPO) miingon nga ang mga saksi mitug-an nga gikang nakig-inom si Marlon sa iyang mga higala sa usa ka tindahan.
Si Marlon nananghid nga mopauli sa iyang gipuy-an ug misulod kini sa lawak ug migawas nga nagdala na og kalibre 38 nga revolver.
Matud pa ni SPO3 Ybañez nga sa paggawas sa biktima gikan sa lawak nagdala kini og armas ug gipatuyok-tuyok ang tambor nga adunay bala.
Sa ikaduhang higayon sa pagpatuyok-tuyok ni Marlon sa tambor sa revolver iya kining gition ang sumbohan sa iyang dughan ug gikablit.
Gihakop og grabeng kakulba ang mga amigo ni Marlon dihang iyang gikablit ang gatilyo sa revolver ug kalit lang nga milanog ang buto.
Ang samaron nga si Marlon dali nga gihatod sa iyang pamilya ngadto sa Lapu-Lapu City District Hospital apan gideklarar kini sa mga doktor nga patay na. Matud ni SPO3 Ybañez nga ilang gitambagan ang pamilya ni Marlon nga ipa-autopsy ang patay’ng lawas niini aron pagsuta wala ba kahay mipatay sa batan-ong Bol-anon. - /RUB (BANAT NEWS)
- Latest
