Kapolisan ug kabarangayan mag coastal cleanup
CEBU, Philippines - Nagtambayayong ang kapolisan ug opisyal sa kabarangayan sa pagpahigayon og coastal cleanup karong adlawa diha sa palibot sa mga coastal barangay sa isla sa Mactan ug Olango. Si Senior Superintendent Rey Lyndon Lawas, hepe sa kapolisan sa Lapu-Lapu City Police Office nagkanayon nga ang maong pagpanglimpiyo diha sa coastal barangays sa Mactan ug Olango pagpangandam kini sa nagsingabot nga summer season diin siguradong modagsa ang mga lokal ug langyaw nga mga turista kinsa mobisita diha sa kadagatan sa dakbayan sa Lapu-Lapu.
Ang kapolisan gitahasan ni Lawas nga mosalmot sa pagpanglimpiyo uban sa mga opisyal ug kawani sa barangay.
Ang mga PNP personnel sa headquarters adto kini idestino sa Mactan Shrine atol sa coastal cleanup. Matag tuig gihimo ang maong kalihukan alang sa pagmentinar sa kalimpiyo sa maong dapit alang sa mga dumuduong.
Magsugod ang coastal cleanup mga alas 5:00 sa buntag diin ang sentro sa mga manglimpiyo mao ang ilawom sa kadagatan nga walay mga mahait nga butang sama sa lata ug botilya nga makasamad.
Si Mayor Paz Radaza miawhag sa mga residente sa coastal barangays sa pag-abag sa kapolisan sa maong cleanup. (BANAT NEWS)
- Latest
