Laing “nangawat” sa P1M sa mall nadakpan
CEBU, Philippines - Nadakpan sa kapolisan ang laing kawatan nga kauban sa guwardiya nga una nang nadakpan sa kapolisan sa lungsod sa Boljoon niadtong miaging Biyernes sa hapon.
Ang nadakpan mao si Jose Niño Zamora, 29, way klarong address nga maoy kauban sa guwardiya nga si Romulo Jurado nga taga Guihulngan, Negros Oriental nga maoy unang nadakpan sa kapolisan sa lungsod sa Boljoon.
Si Jurado ug Zamora maoy suspetsado sa pagkawat sa gibanabanang P1 milyon nga kantidad nga salapi sa Sosyo Land Supermarket nga nahimutang sa dalan B. Ceniza sa Barangay Centro, dakbayan sa Mandaue.
Matud pa ni SPO3 Marcos Noval Jr., nga human sa pagkasikop kang Jurado mitug-an kini kun si kinsa iyang kauban nga ang angga “Iño.â€
Si “Iño†na-trace nga mopaingon sa Barangay Bunga, dakbayan sa Toledo sanglit may igsuon kini nga nagpuyo sa maong dapit mao nga ilaha kining giadto kagahapon sa buntag ug natayming nga mao pay pag-abot gikan nangompra gamit ang gidudahang bahin sa kwartang gikawat gikan sa tindahan.
Bisan nadakpan na ang duha gipangita pa karon ang duha pa nila ka mga kauban. Nasuta usab nga si Jurado maoy naniid sa butangan sa halin sa maong tindahan ug gituyo niini nga magpabilin sa bodega atol sa pagpanirado ug diha na niini gikawat ang kwarta. (BANAT NEWS)
- Latest
