Bayaw sa bise Mayor gipatay

CEBU, Philippines - Patay na nga napalgan ang bayaw sa bise mayor sa lungsod sa Asturias  tungod kay gikatahong wala mobayad sa gipakyaw niini nga traysikol hinungdan nga gipatay kini sa drayber diha  sa sitio Makalolooy, barangay Owak sa lungsod sa Asturias sa miaging adlaw.

Ang biktima naila nga si Rostico Flores, nga bayaw ni Bise Mayor Joel Dumdum. Samtang ang suspek naila nga si Samuel Marfega, molupyo sa sitio Combado, Cantuod , Balamban.

Base sa imbestigasyon sa kapolisan nga ang biktima napalgan sa mga molupyo sa maong dapit pasado alas 7:00 sa miaging buntag.

Unang nagduda ang kapolisan nga naghikog ang biktima tungod kay may higot man nga pisi ang liog niini nga gihigot sab sa pagatpat.

Apan dihang gipalawman pa sa kapolisan ang ilang imbestigasyon nasuta nga gipatay diay kini sa drayber sa traysikol nga si Marfega tungod kay wala kini mohatag sa iyang P200 nga pleti.

Nasuta sa imbestigasyon nga ang biktima gikatahong misakay sa traysikol sa suspetsado ug nikanaog sa usa sa mga tindahan sa may Asturias Auditorium.

Matud pa sa usa ka saksi nga helper sa usa ka tindahan ngadto sa mga imbestigador nadunggan niya  ang biktima ug ang suspetsado nga miingon kini nga iyang pakyawon og P200 ang drayber.

Apan sa dili pa kini bayran, gusto pa sa biktima nga makig-inom una sa drayber sa traysikol ug paglabay sa pipila ka minutos ang biktima mimando sa drayber nga gusto niining moadto sa usa ka videokehan sa barangay Owak.

Apan dihang naabot na sila sa Owak gipanginil kini sa suspetsado sa gisaad nga P200 nga pletihan tungod kay wala nay gatas ang iyang anak, apan ang suspek mitug-an sa kapolisan nga gikatahong gidukol kini sa biktima hinungdan nga nahinaykan kini.

Narekober sa kapolisan ang usa ka yawe diha sa biktima ug ingon man ang usa ka cellphone, ug postiso niini.

Ug dihang giadto nila ang balay sa suspetsado didto nila nahibaw-an nga ang yawe nga na-recover sa lawas sa biktima iya diay sa suspek.

Ang suspek nadakpan sa barangay Nangka sa lungsod sa Balamban, sumala pa miangkon kini sa maong krimen.  Ang suspetsado pasakaan og kasong homicide karong adlawa. (BANAT NEWS)