Basura naGtipun-og sa dagat

CEBU, Philippines - Ang kadagatan nga nahimutang sa tunga-tungang bahin sa Barangay Sawang Calero ngadto na sa kanhi Kawit Island napuno na sa basura nga ang gihabogon tupong na sa tawo tungod sa pagpataka og labay sa mga sagbot nga maanod gikan sa kasapaan kun dunay kusog nga uwan.

Mao kini ang gibutyag ni Ranolfo Sebusa, ang executive director sa Bantay Dagat Task Force, human nga pipila sa iyang mga sakop, mga kawani sa Department of Environment and Natural Resources (DENR), Coast Guard ug mga Japanese divers misawom sa mao nga bahin sa kadagatan.

Matud ni Sebusa nga ilang gisusi kun unsa na ang dagway sa ilawom sa kadagatan ug nakapanglingo-lingo sila nga nakakita sa sitwasyon sa kinahiladman sa dagat.

Si Sebusa mitug-an nga apil sa misawom sa kadagatan ug nakakita sa nagliundok nga basura didto sa ilawom mao ang Japanese divers nga sila si Jun Takaya, Niko Takaya ug ang asawa ni Niko nga usa gihapon ka Hapon.

Ang mga divers mikuha og hulagway apan unya pa kini sunod semana mahatag ngadto kang Sebusa.

Sugyot ni Sebusa nga ang mao’ng mga basura nga naglakip sa mga nagtipun-og nga selopin, mga sako, ug ubang matang sa sagbot kinahanglan g’yud nga kuhaon aron dili moabot ang higayon nga masangad na ang mga barko nga moagi sa mao nga lugar.

Mata’g tulo ka buwan ang Coastal Management Board (CMB) sa dakbayan sa Sugbo kanunay’ng magpahigayon og pagpanglimpyo sa mga sapa ug kabaybayonan apan dili sila makalimpyo sa ilawom sa dagat.

Ang mao nga bahin sa dagat gibana-bana nga adunay giladmon nga 12 ka dupa kon 60 feet.

Si Sebusa miingon nga iyang isugyot ni Konsehal Nida Cabrera, pangulo sa Committee on Environment sa Cebu City Council, nga pagahinan og salapi ang paghaw-as niining maong ubay-ubay nga tonelada sa basura gikan sa ilawom sa dagat.

Ang paghaw-as sa mga basura nga anaa sa ilawom sa dagat dili na obligasyon sa Cebu Port Authority (CPA) tungod kay ang mao nga dapit wala na mahimutang sa pantalan.

Matud ni Sebusa nga angayan g’yud nga ang kagamhanan sa dakbayan sa Sugbo maoy mohimo’g lakang aron ang mao nga mga basura dili makadaut sa mga isda.

Sugyot ni Sebusa nga edukahon gayud ang katawhan nga dili maayo ang paglabay sa ilang mga sagbot ngadto sa kasapaan kay ang mga basura maanod kini sa kadagatan kun adunay kusog nga baha.

Si Sebusa miingon nga maayo nga butangan og salaan ang gawasanan sa kasapaan aron ang mga basura dili direkta nga mapunta sa kadagatan panahon nga adunay kusog nga uwan. (BANAT NEWS)