Mga butang sa gipatay nga kolektor nakuha sa sud sa tindahan sa suspek

CEBU, Philippines - Napalgan ang personal nga mga butang sa gipatay nga lending collector sa sulod sa gikandadohan nga tindahan sa gidudahang suspetsado diha sa Sitio Capulay, Barangay Tayud, Lungsod sa Liloan human masulod sa kapolisan niadtong Miyerkules sa hapon. Ang kapolisan sa Liloan nakakuha og search warrant gikan ni Judge Teresita Galanida sa Branch 56 sa Regional Trial Court (RTC) 7 sa dakbayan sa Mandaue  aron maablihan ang tindahan sa suspek nga si Julian Cervantes, 53.

Si Cervantes maoy giingong kataposang gipaningil sa biktima nianang nahanaw ang biktimang si June Quijano.

Si SPO3  Marcelino Servilla, imbestigador sa kapolisan sa maong lungsod miingon nga ang personal nga mga butang sa biktima nga ilang nakuha mao ang duha ka cellphone, helmet, rubber sandals, ballpen sa lending company nga giisyu ngadto sa biktima ug medyas niini.

Nakaplagan usab nila ang mga butang nga gituohan maoy gigamit sa pagpatay kang June Quijano nga naglakip sa martilyo nga puthaw ang gunitanan, martilyo nga kahoy ang gunitanan, tubo ug heat insulator nga ilang gituohan nga tipik sa giputos sa patay’ng lawas sa biktima. Gipakuyog sa pagsulod sa maong tindahan si Cervantes, 53, ug gisaksihan usab sa duha ka barangay konsehal nga sila si Barangay Konsehal Enrico Cuyos ug Barangay Konsehal Alfie Pepito.

Si Servilla miingon nga si Rodrigo Villacin, branch manager sa Fund Line Finance Corporation nga gitrabahoan ni Quijano, mitug-an nga ang suspetsado duha na ka higayon nga naka-loan kanila. Ang unang pag-loan P30,000 apan P10,000  ra ang ilang naaprobahan ug sa pag-renew  P10,000 ra gihapon ang naaprobahan.

Duha ang gituohan nilang motibo nga maoy nakaaghat sa pagpatay sa biktima ang una mao nga nasuko kini nga gamay lang ang giaprobahan nga  loan  ug ang ikaduha mao nagtuo ang suspetsado nga nagdala og dakong kantidad ang biktima nga maoy hinungdan nga gitulis niya kini. (BANAT NEWS)