Mga kawatan miatake na ‘sab
CEBU, Philippines - Duha ka balay patigayon dinhi sa dakbayan sa Sugbo gilungkab ug nakuhaan lang sa kawatan og kapin sa P40 mil.
Ang gilungkab mao ang buhatan sa Western Union nga nahimutang sa Osmeña Boulevard sa Barangay Capitol Site ug ang Unit 802 sa Keppel Building nga nahimutang sa Cebu Business Park.
Ang gwardya sa Western Union nga si Leonides Genonsalao nakadiskobre nga guba na ang kisame sa ilang opisina pag-abli nila kagahapon sa buntag.
Ang kawatan didto miagi sa mao nga lungag sa kisame human kini nakasulod sa atop nga bahin sa building.
Apan wala giswerte ang kawatan kay napakyas siya pagbukas sa vault mao nga wala kini makadala og kwarta. Ang nakuha sa kawatan mao ra ang kalibre .38 nga armas sa gwardya ug 17 ka bala.
Gitoohan sa kapolisan nga bata ang milungkab sa Western Union kay screw driver ra ang iyang gigamit nga pangligwat. Dunay nagduda nga ang Western Union gisulod sa kawatan kaniadtong Martes sa gabii.
Samtang ang kawatan nakasulod sa Unit 802 sa Keppel Building gamit ang hinimo-himo nga yawe.
Si Maureen Lal, account manager sa A Janty Inc. mitug-an sa kapolisan nga gidala sa kawatan ang duha ka laptop nga kantidad og tag P20 mil. Giapil pa g’yud sa kawatan ang electronic cigarette device nga mobalor og P1,500. (BANAT NEWS)
- Latest
