EMB naproblema sa mga tighabwa’g hugaw sa kasilyas

CEBU, Philippines - Adunay mga tighabwa og hugaw sa mga pansayan dinhi sa Metro Cebu nga nakahatag og problema sa Environmental Management Bureau (EMB) kay bisan asa ra nila ilabay ang ilang mga hinabwa.

Si Engineer Cindylyn Pepito, environmental management specialist sa EMB-Region 7, mitug-an niini atol sa pag-atubang niya sa mga sakop sa Cebu City Council.

Gitug-an ni Pepito nga nakadawat sila og reklamo gikan sa mga opisyal sa kabarangayan, sagad mga barangay nga nahimutang sa bukid, nga adunay mga tighabwa og hugaw sa pansayan nga adto ilabay sa ilang dapit ang mga hinabwa.

Matud ni Pepito nga sila sa EMB nabalaka nga makahatag og problema sa tinubdan sa tubig ang mao nga mga hugaw nga ilabay sa bisan asa nga lugar.

Nagpatabang si Pepito sa mga sakop sa City Council aron mahunong ang binuang niining mga tighabwa og hugaw sa pansayan nga bisan asa lang ilabay ang mga hinabwa.

Si Pepito miingon nga naproblema sila sa EMB kay magbalhin-balhin ang opisina niining mga tighabwa og mga hugaw sa pansayan.

Nalipay si Pepito sa gipasalig sa mga konsehal sa dakbayan nga moabag sila pagbantay niining mga septic waste haulers nga walay labayanan sa ilang mga hugaw.  (BANAT NEWS)