Barko nasangad

CEBU, Philippines - Usa ka barko nga mipahigayon sa iyang ‘maiden voyage’ o labing una untang biyahe ang nasangad sa miaging gabii diha sa kadagatan sa barangay Pusok sa dakbayan sa Lapu-Lapu.

Hinuon luwas ra nga nakakanaog ang 114 ka mga pasahero ug tripulante niini sumala pa sa Coast Guard.

Matud ni Coast Guard Cebu-Station Commander Rodolfo Villajuan mibiya ang M/V Lady of Love sa Medallion Shipping Lines sa Pier 4 alas 9:00 sa milabay’ng gabii padung sa Palompon, Leyte luwan ang 87 ka pasahero ug 24 ka tripulante niini.

Base sa impormasyon nga iyang nakuha gikan ni Capt. Ricardo Gesutura, ang kapitan sa maong barko,  nakasinati sila og "engine trouble" pipila ka minutos human sa ilang pagbiya sa pantalan hinungdan nga mipadaplin sila apan nasangad hinuon sila sa mabaw nga bahin sa baybayon sa Pusok.

Ang 27,434 gross tonnage nga barko, nagdala sa 87 ka pasahero, napadpad sa baybayon sa barangay Pusok, Lapu-Lapu City ug misangad diin naigo ang dung nga bahin sa barko.

Kagahapon sa alas 8:45 sa buntag, giguroy ang barko gikan sa nasangaran sa tugboat sa PCG Mandaue substation paingon ngadto na sa Tayud shipyard diin kini gi- inspeksyon sa Maritime Industry Authority (MARINA) pasado alas-4  kagahapon sa hapon.

Matud sa Coast Guard, ang tanang pasahero anaa lamang sa barko nga nakaangkorahe sa Liloan samtang naghuwat sa resulta sa inspeksyon .

"She is docked at shipyard in Liloan. Apparently, her engine problem was fixed already but we have advised for her to be inspected by MARINA before allowed to sail again," matud ni PCG Central Visayas commander Commodore William Melad. Gikonsiderar hinuon ni Melad nga gamay’ng problema ang pagkaguba sa fuel lines sa makina apan kinahanglang masiguro nga luwas kini makabiyahe. 

Kagahapon mi-file na og marine protest ang kapitan sa M/V Lady of Love ug gipalarga na dayon human ma- inspeksyon . (BANAT NEWS)