Ang hustong panghunahuna

CEBU, Philippines -  Usa kini sa mga yawe sa kalamposan sa atong pangandoy. Naglambigit kini og hugtanon nga determinasyon sa maayong paghan-ay sa mga giplano nga ugmaron o buhaton, pinaagi sa hustong panghunahuna. Di nato mabasul ang uban nga sagad, kun may mahunahunaan, wa nay himuon nga pagtuon, bahala’g unsay mahimong linugdangan. Mao nga permi na lang nabug-atan sa pagdawat sa mga kapakyasan sa kinabuhi. Busa maayo atong tutokan kini nga matun-an.

Hinuon may pipila nga buot magbaton aning husto nga panghunahuna, apan mubo ra ang pailob sa pag-aninaw sa iyang paghimo’g lakang kun unsay angay nga buhaton. Di man gud ta pareho’g kasinatian, diin maoy kanunay gikuhaan sa pagbase sa atong mga disisyon, diha pa lang sa panghunahuna. Angay ihapsay gyud pag-ayo. Ang mga skolar o eksperto aning bahina, mihatag sa ilang mga tambag isip giya kun unsaon nga mabatonan ang husto nga panghunahuna:

(1) Himoang magtutudlo ang kagahapon sa pagkat-on – Kinahanglan di nato kastigohon o bun-ogon ang kaugalingon gumikan sa nangaging kapakyasan, alkanse, kasaypanan, ug kawad-on nga magpakawa na lang sa paglaom. Karon maoy labing maayong kahigayonan, sa paghimo og kausaban.

 (2) Magbag-o’g panan-aw o panghunahuna – Dili na kita kabahin sa kagahapon nga mao lang gihapon ang sagupon sa pagkakaron. Usa ba kanang mentalidad nga kinsa kita, unsa kita o unsay gusto nato dihadiha mahimo dayon. Ang karon mahimong sama ra sa kagahapon o sa nangaging adlaw, nga ang tanan mag-agad lang gayud kun giunsa pagpahimutang ang imong hunahuna.

(3) Suhitoa ang kaugalingon mo – Ang pagsuhid, pagtukib, maoy pag-ila sa kaugalingon mo, aron masayran ang imong katakos o ang kinutuban sa imong abilidad. Mahinungdanon kini kay dinhi imong makalkulo ang pagtimbang nga mabalanse ang pagbaton og maayong kinaiya sa hustong panghunahuna. Aron kini maoy kasandigan sa paningkamot nga maabot mo ang imong padulngan.

(4) Pag-ila sa maayo o dili –Ang kahibalo kun unsay maayo o dili sa mga butang o situwasyon, importante sad kini, kay dili man kita makaseguro kun di kita makamao mohulagway sa katarong o kadautan. Sa ato pa, higpiton nato nga masunod ang lagda sa moral ug spirituwal, aron way babag sa kalampusan.   (BANAT NEWS)