Napusilan ug nadakpan

CEBU, Philippines -  Usa ka ulitawo nga nagluklok og armas nga mipusil unta sa mga polis nga modakop kaniya naunhan pagpusil ug naangol didto sa Sitio Asinan, Barangay Mantuyong, dakbayan sa Mandaue kaniadtong Lunes sa gabii.

Si Jeffrey Demape, 21, taga Barangay Mantuyong, nakaangkon og samad sa iyang paa dihang gipusil siya ni PO1 Mar Villamonte nga maoy unang nakakita nga mihulbot na unta sa iyang armas ang maong tawo.

Matud ni PO1 Gerome Lendio nga ang mga sakop sa Presento 1 sa Mandaue City Police Office (MCPO) miresponde sa alarma nga adunay armado’ng tawo nga nasigpatan didto sa Sitio Asinan.

Apan ang suspek nakabantay sa pag-abot sa kapolisan nga gipangulohan ni PO2 Ariel Gingco mao nga dali unta kini nga mihulbot sa iyang armas. Matud ni PO1 Lendio abtik kaayo si PO1 Villamonte mipusil ni Demape ug nahagba kini dihang naigo sa bala ang tuo niya nga paa.

Nasakmit sa kapolisan gikan ni Demape ang kalibre .38 nga revolver nga adunay unom ka bala. Pagrikisa sa kapolisan sa bulsa ni Demape nakuhaan pa g’yud og tulo ka paketeng shabu.

Ang samaran nga suspek gidala sa Mandaue City Hospital ug gikatakda nga pasakaan karong adlawa og duha ka kaso paghupot og walay lisensya nga armas ug illegal nga drugas.   (BANAT NEWS)