Tanang anggulo gisubay sa nahanaw nga Flight MH370
CEBU, Philippines - Gisubay sa mga aviation experts ang tanang anggulo kun nganong nahanaw ang Malaysian Airlines Boeing 777 jet nga dunay 239 ka pasahero ug tripulante diha sa kadagatan sa Vietnam.
Lakip sa ilang gitan-aw og maayo karon mao ang posibilidad nga gi-hijack kini sa mga terorista gumikan sa nadiskubrehan nga duha ka mga kinawat nga pasaporte kapin usa ka tuig na ang milabay ang gigamit sa duha ka mga misakay niini.
Ang mga barko sa Malaysia nga misiksik karon sa kadagatan sa South China Sea mibutyag nga duna silay mga nakit-ang oil slick sa dagat ug ilaha na kini karong gipasusi sa laboratory kun iya ba kini sa eroplano sumala pa sa hepe sa Department of Civil Aviation chief, Azharuddin Abdul Rahman.
Ang U.S. Federal Aviation Administration ug U.S. National Safety Transportation Board miabot na usab sa Malaysia aron motabang sa imbestigasyon.
Ang Flight MH370 migikan sa Kuala Lumpur niadtong Sabado sa kaadlawon padung sa Beijing dihang kalit kini nahanaw sa radar sa Malaysia ug sa Vietnam samtang naglupad ibabaw sa South China Sea. (BANAT NEWS)
- Latest
