Grass fires na ‘sab sa Mandaue

CEBU, Philippines - Gawas sa dakbayan sa Lapu-Lapu, ang dakbayan sa Mandaue nakasinati usab og sunod-sunod nga alarma sa sunog tungod sa grabe’ng kainit karon sa panahon.

Kanunay lang mahaulpot ang kabomberohan sa Mandaue kun makadawat sila’g tawag nga adunay miulbo nga sunog apan inig-responde nila sunog ra diay sa mga laya nga sagbot.

Daghan ang nahibulong ngano nga mosiaw gayud ang mga sunog panahon nga magsaulog ang nasud sa Fire Prevention Month matag buwan sa Marso.

Apan si SFO3  Roy Garcia, imbestigador sa Bureau of Fire Protection (BFP) sa Mandaue mipasabot nga nagumikan kini sa grabe’ng kainit sa panahon.

Matud ni SPO3 Garcia nga matag adlaw makaresponde sila og duha ngadto sa tulo ka grass fires nga nahitabo sa kabarangayan.

Kaniadtong Sabado duha ka grass fires ang ilang narespondehan ug gisundan kini og tulo ka alarma sa grass fire pagka Domingo nga miulbo sa Barangay Umapad, Subangdaku ug Jagobiao.

Ang imbestigador miingon nga ang mga laya nga sagbot sa bakanteng mga luna gituohang gilabayan og upos sa sigarilyo nga nagbaga pa maoy hinungdan sa pagkasunog.

Matud ni SFO3 Garcia nga gipahimangnoan nila ang katawhan nga kun manigarilyo dili magpataka og labay sa ilang mga upos.  (BANAT NEWS)