Lanfill sa Tapul kinahanglan g’yud og manager

CEBU, Philippines - Ang konseho sa dakbayan sa Talisay mihangyo ni Mayor Johnny De los Reyes nga pabutangan og “full time” sanitary landfill (SLF) manager ang labayanan og basura sa Barangay Tapul.

Gawas sa manager, awhag usab sa konseho pabutangan usab og task force ang landfill nga ubos sa pagdumala sa manager nga momentinar matag adlaw sulod sa 24 oras.

Kahinumduman nga ang landfill sa Tapul nasunog tungod sa methane gas ug gikataho usab nga dunay mga scavenger nga magdaob sa landfill nga maoy usa sa hinungdan pagsilaob sa kayo sa maong lugar.

Si Konsehal Antonio Bacaltos, tsirman sa committee on environment sa konseho, miduso og resolusyon nga naghangyo sa mayor sa mao nga katuyoan.

Matud ni Bacaltos nga obligasyon sa lokal nga kagamhanan ang pagproteher ug pagpreserbar sa tanang gi-invest nga proyekto.

Iyang gipasabot nga ang siyudad daku og gasto pagmugna sa sanitary landfill sa Sitio Tapul sa tumong nga makasulbad kini sa problema sa basura ug mapreserbar ang kalikupan.

Si Bacaltos miingon nga kun duna pa’y nagdumala sa landfill hayan malikayan unta ang pagkasunog sa Pond C sa labayanan og basura ug kun aduna pay task force nga makabadlong sa mga scavengers makontrolar usab ang pagtam-ok sa basura.

Pagka karon ang landfill sa Tapul nahisama lang sa “Open Dumpsite” kay wala man matuman ang sistema nga matag basura nga itam-ok tabunan unta dayon og yuta. (Brenda D. Batuto/RUB)

Clearing sa kabalayan sa Tejero karon

Ipahigayon karong adlawa ang clearing operations sa nahabiling kabalayan unahan sa dalan Alviola, Barangay Tejero aron mahimo na ang karsada nga mulapos sa General Maxilom Avenue sa Barangay Caretta.

Matud ni Tejero Barangay Konsehal Garry Lao nga ang ubang sa mga molupyo nagsugod na gani og pagpangguba sa ilang kabalayan kay sila hatagan man og dapit nga kabalhinan ingon man P10 mil nga hinabang.

Ang 39 ka pamilya adto balhinon sa luna sa dakbayan nga nahimutang sa Upper Laguerta, sakop sa Barangay Lahug. Gituohan nga ang pagbukas og karsada sa mao nga dapit makatabang pagpaminus sa problema sa trapiko.  (BANAT NEWS)