Duha patay, 5 angol sa bangga
CEBU, Philippines - Duha ang patay ug lima ang angol lakip na sa upat ka tuig nga bata’ng babaye sa managlahing aksidente sa kadalanan sa lalawigan sa Sugbo.
Patay ang usa ka lalaki nga nabanggaan sa motor dihang milabang kini sa karsada pasado alas-7 sa miaging gabii sa barangay North Poblacion sa dakbayan sa Naga.Ang biktima naila nga si Rolando Enanosa, residente sa nahisgotang dapit.
Samtang ang suspek naila nga si Benjie Olis, 32, molupyo sa San Fernando nagmaneho og usa ka Honda XRM nga motorsiklo.
Base sa imbestigasyon sa kapolisan nabanggaan sa suspek si Enanosa atol sa paglabang niini hinungdan sa grabeng kadaot sa iyang lawas nga miresulta sa iyang kamatayon. Samtang tungod sa ligid nga nibuto drayber sa motor namatay ug naangol ang anak ug asawa niini sa barangay Sta. Cruz sa lungsod sa Ronda pasado alas 2:00 sa miaging hapon.
Ang namatay naila nga si Felife Cuadero, 48, molupyo sa nahisgotang lugar samtang naangol ang asawa niining si Norma Relator Cuadero, ug ang 4-anyos nila nga anak.
Base sa imbestigasyon sa kapolisan nga nakadungog og buto ang mga saksi sa dapit ug ila na lang nabantayan nga nagbuy-od na ang mga biktima sa karsada ug ilang gitabang ug gidala sa tambalanan.(/EIM)(BANAT NEWS)
- Latest
