Gipangayo nga usbaw sa pletehan gitun-an pa

CEBU, Philippines - Tun-an pa sa kadagkoan sa Land Transportation Franchising and Regulatory Board (LTFRB) kun angay ba nga uyonan nila ang gipangayo nga usbaw sa pletehan sa mga jeepney dinhi sa Sugbo.

Ang petisyon sa Cebu Integrated Transport Service Multipurpose Cooperative (CITRASCO) nga nangayo og dos pesos nga usbaw sa pletehan sa Public Utility Jeepney (PUJ) gisumiter na sa LTFRB.

Matud ni LTFRB regional director Ahmed Cuizon nga si Ryan Benjamin Yu, ang presidente sa CITRASCO, maoy nangulo pagduso sa petisyon didto sa iyang opisina.

Si Yu nga mao usab ang tsirman sa Cebu Confederation of Transport Operators and Drivers Association, Inc. mitug-an nga ang gibasihan sa ilang petisyon mao ang pagsaka sa prisyo sa kagamitan sa sakyanan.

Kini sama sa battery, ligid ug pyesa sa sakyanan nga maoy ilang basehanan pag-awhag sa LTFRB nga dugangan ang kantidad sa pletehan.

Malaumon si Yu nga uyonan sa LTFRB ang ilang hangyo. Gitataw ni Yu nga dunay posibilidad nga ang public hearing sa gipangayo nga usbaw idungan kini sa uban pa nga petisyon nga adto himoan og hearing sa Manila.

Ang mga tag-iya og bus nga nagbiyahe sa kalungsoran sa Sugbo wala kaayo ganahi nga mangayo’g usbaw sa ilang pletehan.

Si Jolito Flores, presidente sa Cebu South Mini Bus Operators Association ug tigpamaba sa kahugpongan sa mga bus operators sa Sugbo, miingon nga nagpabilin nga ubos ang pletehan sa ilang mga bus.

Matud ni Flores nga nakasaad sila’ng mga bus operators nga dili mangayo og usbaw sa pletehan sa bus sa Sugbo hangtud nga maagwanta pa nila ang ginagmay’ng kita mata’g adlaw.

Dunay mga pasahero nga nakuhaan og pamahayag sa Banat Manobela miingon nga kun aprobahan sa LTFRB ang petisyon sa mga PUJ operators, dili kini makiangayon kanila nga walay umento sa sweldo.

Karong bag-o, kadtong mga trabahador lang nga nagsweldo og minimum maoy pahatagan og P13 nga Cost of Living Allowance (COLA) ug walay labot ang ubang kawani. (BANAT NEWS)