Nihit ug mimahal ang mga karne karon

CEBU, Philippines - Nabantayan karon nga nagnihit ang supply sa karneng baboy sa kamerkadohan dinhi sa Sugbo ug ubang bahin sa Central Visayas.

Si Rolando Tambago, presidente sa Central Visayas Pork Producers' Cooperative, miingon nga ang hinungdan sa pagnihit sa supply sa karneng baboy sa Central Visayas nagumikan sa pagsaka sa panginahanglan sa mga karne didto sa Region 8.

Matud ni Tambago nga mitug-an ang ilang counterpart sa Mindanao nga dili na makaabut sa Sugbo ang supply sa mga baboy kay daku kaayo ang panginahanglan didto sa Tacloban ug ubang mga lugar sa Leyte ug Samar nga grabing naapektohan sa bagyong Yolanda sa miaging tuig.

Si Tambago miingon nga ang mga negosyante og baboy sa Mindanao mipili nga adto sila motumod sa Eastern Visayas tungod sa kataas sa prisyo didto.

Dugang ni Tambago nga ang mga negosyante og baboy sa Eastern Visayas wala pa hingpit nga nakabangon sa ilang negosyo mao nga taas kaayo ang panginahanglan sa baboy sa mao nga rehiyon.

Gani nagtoo ang mga negosyante og mga karne nga mosaka og labing minus P10 ang prisyo sa karneng baboy sa kamerkadohan dinhi sa Sugbo gikan sa P190 ngadto na sa P200 matag kilo.

Gituohan nga mabalik lang ang normal nga prisyo sa baboy kun makabalik sa negosyo ang mga tawo nga namuhi og baboy sa Leyte ug Samar.

Nabantayan usab ang pagnihit karon sa suplay sa itlog sa kamerkadohan hinungdan nga misaka usab ang prisyo niini. Ang hinungdan mao ang pagkaguba sa mga poultry farms didto sa Bantayan ug ubang dapit tungod sa bagyo. – /RUB (BANAT NEWS)