Tax amnesty ipatuman sa Talisay

CEBU, Philippines - Ang mga gahi mamayad og buhis nga mga nanag-iya og propriyedad sa dakbayan sa Talisay hatagan og napulo ka buwan nga tax amnesty sa sugod niining buwana.

Si city council majority floor leader sa konseho sa Talisay, Richard Francis Aznar nagkanayon nga ang paghatag og tax amnesty pinaagi sa pagtangtang sa mga penalty, fees ug charges sa mga buhis nga wala mabayari makaaghat sa mga investors.

Ug ang magbubuhis maaghat usab og bayad sa ilang mga obligasyon ug mauswag usab niini ang ekonomiya.

Si Aznar mipalabang og resolusyon sa maong katuyoan kinsa si Konsehal Edward Alesna nga chairman sa committee on Appropriation, Budget Management and Ways and Means maoy co-author niini.

Si Aznar nagkanayon nga  kadtong wa pa kabayad og mga real property kinahanglang mopahimulos sa maong oportunidad  aron di sila makalapas sa Akta Republika 7160 kon “Civil Remedies For Collection of Revenues”.

Matud ni Aznar nga kung mapirmahan na sa mayor ang nahisgutang resolusyon ipatik kini sa pangpublikong dapit sa siyudad ug ipublikar sa tulo ka mga nag-unang pamantalaan sa probinsiya aron mahibaw-an sa tanan. Ang mayor mipadayag nga suportahan niya ang maong resolusyon.  (BANAT NEWS)