Non-teaching staff sa TCC mireklamong wa sweldohi

CEBU, Philippines - Sobra sa 30 ka non-teaching personnel sa Talisay City College (TCC) mireklamo nga wala gihapon sila sweldohi sukad pa niadtong buwan sa Enero niining tuiga.

Kagahapon sa buntag si Wendy Labajo kinsa maoy mirepresentar sa non-teaching personnel ang mibarog sa konseho sa siyudad ug mipadayag sa ilang mga reklamo  kay wa sila masweldohi.

Matud ni Labajo nga sukad niadtong buwan sa Enero hangtud sa Pebrero niining tuiga wala pa sila makadawat sa ilang sweldo bisan giaprubahan  na ang P14 milyones nga budget alang sa TCC.

Ang mga non-teaching personnel magdawat kini og P6,500 nga sweldo matag buwan ug naglisod sila kay duna silay mga pamilyang gisuportahan.

Si Bise Mayor Romeo Villarante mitambag kanila pagpangita og legal remedies sa maong problema.  Ang TCC na-establisar niadtong tuig 2004 ubos sa usa ka ordinansa ug sa buwan sa Hunyo sa maong tuig gibuksan na kini.

Si kanhi kongresista Eduardo Gullas kinsa maoy mayor kaniadto sa Talisay maoy usa sa nangamahan nga matukod ang maong tunghaan. Si Konsehal Richard Francis Aznar kinsa maoy chairman sa committee on education sa konseho sa Talisay ang nakapalabang na og resolusyon nga naghangyo sa mayor sa pagpagawas dayon sa sweldo sa non-teaching personnel.

Niadtong Pebrero 27, 2014 giingong ang mga non-teaching personnel gipatawag sa mayor alang sa usa ka meeting diin sila giingong papirmahon og kontrata nga kutob lang sila sa buwan sa Pebrero aron makuha ang ilang sweldo.

Apan ang mga non-teaching personnel nagdumili sa pagpirma sa maong kontrata tungod kay nagtuo sila nga kung mopirma sila sa maong kontrata sama ra  mi-resign sila sa ilang trabaho.

Si Mayor Johnny De los Reyes sa iyang bahin, nagkanayon kini nga si Richel Bacaltos maoy mi-hire sa mga non-teaching personnel bisan og limitado ang budget alang sa mga sweldohan sa mga school personnel.

Matud sa mayor nga ang siyudad migahin og P12 milyones alang sa sweldohan sa TCC personnel apan wala na kini makapaigo tungod kay si Bacaltos giingong padayong nang-hire og dugang job order sa TCC.

Apan matud ni Labajo nga dili tinuod nga deficit ang TCC ubos sa pagdumala ni Richel Bacaltos tungod kay niadtong tuig 2012 sobra sa P8 milyones ang koleksiyon sa tunghaan ug ang siyudad mi-subsidized og kapin sa P3 milyones aron ma-cover ang tanang galastohan sa TCC. Si Labajo mikwestiyon nganong mahibulong pa ang kagamhanan sa siyudad nga matag tuig man sila mag-subsidized sa TCC.

Si Labajo nagkanayon nga ang mga non-teaching personnel ug teaching personnel miila gihapon kang Bacaltos nga maoy presidente sa TCC ug giawhag niini ang mayor sa pag-convene sa Board of Trustees (BOT) aron masulbad na ang isyu sa TCC.

Matud ni Labajo nga andam silang mobiya sa ilang pwesto ug motugyan sa mga dokumento ngadto sa matudlo sa BOT nga ipuling mga  staff. Si Bacaltos sa iyang bahin, nagkanayon kini nga dili siya mobiya sa iyang pwesto hangtud nga ang BOT maoy mopabiya kaniya aron pulihan siya og lain.  (BANAT NEWS)