Kagawad patay sa ambush

CEBU, Philippines - Patay ang usa ka barangay kagawad ug naangol ang usa ka barangay kapitan human sila gibanhigan sa tulo ka lalaki nga nagsakay og motor sa utlanan sa barangay Dumlog ug Carmen sa dakbayan sa Toledo pasado alas 4:00 sa miaging hapon.

Ang namatay naila nga si Irene Wamilda, 28, barangay kagawad sa Barangay Capt. Claudio sa dakbayan sa Toledo.

Samtang naangol usab si Captain Claudio barangay kapitan Alexander Alqueza, nga maoy nagdrayb sa multicab sa barangay nga may plakang KFA-452.

Base sa imbestigayon sa kapolisan nga ang mga biktima gikan pa sa dakbayan sa Sugbo gikan mipasaka og kaso diha sa Ombudsman batok sa usa sa ilang mga barangay officials may labot sa pundo sa ilang barangay.

Matud pa nga dihang padulong na pauli ang mga biktima may tulo ka lalaki nga mikalit lang og tupad ug misabay sa ilang multicab ug diretsong mipaulan kanila og bala.

Ang mga saksi mitug-an sa kapolisan nga  nagsuot og helmet ang drayber ug ang naa sa luyo apan wala magsuot og helmet ang naa sa tunga. Matud pa way plate number ang maong motorsiklo.

Si Wamilda nakaangkon og samad sa iyang walang kamot nga milapos padung sa iyang kilid ug wa makalapos ang bala, patay na kini pag-abot sa tambalanan.

Samtang kritikal ang kahimtang ni Alqueza nga naigo sa iyang buko-buko, wala nga dunggan ug sa iyang dughan sa duha ka higayon.

Tungod sa grabeng samad nga naangkon sa kapitan gidala kini sa usa ka tambalanan sa dakbayan sa Sugbo. Ang hepe sa kapolisan sa lalawigan sa Sugbo Sr. Supt. Noel Gillamac miingon nga motabang sila sa gihimong imbestigasyon sa kapolisan sa dakbayan sa Toledo apan ang Toledo City police lang gihapon ang lead investigating agency.

Matud ni Gillamac nga bisan pa man sa sunod-sunod nga insidente sa pagpamusil sa Sugbo dili maisip nga alarming ang maong mga kaso.  (BANAT NEWS)