Tulo patay sa septic tank

CEBU, Philippines - Tulo ka tawo ang namatay human mangahilo sa baho sa sud sa septic tank nga ilang gihabwaan sa hugaw diha sa sitio Camolinas, barangay Poblacion, lungsod sa Cordova alas-8 pasado niadtong miaging Domingo sa gabii.

Ang mga namatay mao sila si Mark Jun Escabas, 16, Joel Minguito, 42, ug Israel Tajanlangit, 33 nga pulos nagpuyo sa maong dapit.

Si SPO2 Laurencio Larry Wagwag sa kapolisan sa maong lungsod miingon nga sila si Minguito ug Tajanlangit maoy gisuholan sa paglimpiyo sa septic tank nga gipanag-iya ni Sherwin Abaño, 43, nga ilang silingan sa maong dapit.

Si PO3 Vilma Degamo, sa Women’s and Children’s Desk sa Cordova Police Station mibutyag nga alas-7 sa gabii dihang gibuboan nila ni Minguito ug Tajanlangit og upat ka litro nga muriatic acid ang septic tank kay  gusto nilang mawala ang baho sa ilang pagsud sa alas-10 sa gabii. “Kanang four liters mahug na’g usa ka gallon unya way maayong laki ana uy,” matud pang Degamo sa The FREEMAN.     Sumala pa nga unang misulod si Menguito sa ubos apan kalit kining nagkirig-kirig maong mitabang dayon si Tajanlangit.

“Nadunggan pa kuno ni Sherwin nga dunay nangayo og pakitabang sa luyo mao ‘to iyang gilipot unya mao na may iyang nakit-an nga minaog na man pud ning usa (Escabas),” matud pang Degamo.

Si Escabas nagtan-aw lang unta og telebisyon nianang tungora dihang nakadungog siya nga dunay nangayo og tabang gikan sa septic tank maong migawas siya aron susihon ug pagkakita niya sa duha dali usab kining mi-ambak aron unta sila tabangan apan naapil siya og kirig ug nalumos.

Ang komosyon nakatukaw na sa ubang mga silingan nga daling miguba sa sementong tabon sa maong septic tank ug diha pa nila naugkat ang tulo.

Sila si Tajanlangit ug Minguito gihatod sa Lapu-Lapu City Hospital apan gideklarar nga patay na, samtang si Escabas gidala sa mga kabanay sa Mactan Doctors Hospital  apan patay na usab kini.

Hangtud ning pagsulat sa balita, wala pay kabanay sa mga namatay ang midangop sa kapolisan aron moreklamo tungod kay matud pa kombinsido silang aksidente gyud ang nahitabo.(Romeo T. Limpangog ug report gikan sa The Freeman/EIM)