Aussie nga milugos sa katabang gikiha
CEBU, Philippines - Kadtong Australian national nga gipasanginlang milugos sa iyang gipaeskuyla nga 17-anyos gipasakaan na og kaso didto sa Toledo City Prosecutor’s Office.
Si PO2 Jeffrey Caburnay mitug-an nga nasang-at na nila ang kaso nga rape batok sa maong 60-anyos kaniadto pang Miyerkules.
Ang biktima midangop sa kapolisan niadtong Pebrero 25, 2014 sa hapon ug misumbong nga gisuwayan siya paglugos sa maong langyaw. Ang biktima lumad nga taga Negros Oriental ug katabang sa maong langyaw.
Gipugngan lang sa Banat News ang ngalan sa langyaw kay wala kini makuhai sa iyang habig sa maong pasangil.
Si SPO2 Liza Maquidato sa Toledo City Women’s Desk sa sayo pa miingon nga gipaeskuyla sa langyaw ang biktima bugti nga kini maoy moatiman sa panimalay sa suspek.
Matud pa nga sa wala pa ang tinguha nga paglugos, gilugos na diay sa suspek ang biktima niadto pang Pebrero 23, ug usban na usab unta kini paglugos niadtong Pebrero 25.
Tungod sa maong reklamo miresponde ang kapolisan ug gidakop ang langyaw. Kun mapamatud-an nga sad-an, hayan mabilanggo ang langyaw sulod sa 20 ngadto sa 40 ka tuig. (BANAT NEWS)
- Latest
