1 natabunan sa minahan

CEBU, Philippines - Usa ka minero ang gikabalak-ang natabunang buhi samtang tulo niini ka kauban nangalandig sa tambalanan human mahugno ang minahan nga ilang gitrabahoan didto sa Barangay Dunga, Danao City kagahapon sa buntag.

Nagpadayon pa ang pagkuykoy sa natabonan nga si Jose Melvin Landero, 22, samtang nagpaabot sa gawas sa minahan sa Seri Mining ang iyang mga kabanay hangtod kagahapon sa hapon nga milanat na og 12 ka oras gikan sa pagkalusno. Way gitugotang sakop sa media nga gipasulod sa maong minahan apan ang mga tagtungod ni Landero mihukom nga magbantay sila sa gawas sa minahan hangtod nga maugkat ang iyang lawas.

Ang mga nangaangol mao sila si Marvin Malabago, taga Barangay Kahumayan, Isidro Bakang, ug usa ka Ranel Villanueva, pulos molupyo sa dakbayan sa Danao

Ang tulo gidala sa Cebu Provincial Hospital sa Danao City apan gibalhin sa Vicente Sotto Memorial Medical Center. Usa sa mga igsuon ni Malabago mibutyag nga ingon sa nabali ang hawak ug likod sa mao nga minero.

Ang ubang mga minero nga gikahinabi sa mga tigbalita mibutyag nga gisuwayan unta nila pagtabang si Landero nga makagawas apan naabtan kini sa paghugno sa yuta dihang nangabali ang mga kahoy nga gipangtukod sa lungag.

Sumala pa nga dunay 14 ka minero sa sulod sa minahan sa carbon atol sa pagkalusno apan 13 lang ang nakagawas gikan sa 400 metros nga giladmon nga lungag.

Si Malabago misuway unta og bira pagpagawas ni Landero apan matud pa miawhag kini nga biyaan na lang  siya kay makapalangay siya sa ilang pag-ikyas gikan sa lungag.

Si Landero maoy kinamaguwangan sa lima ka managsuon ug nagtrabaho wala pa’y usa ka buwan sa minahan diin magtrabaho ang iyang mga paryente.

Gani usa sa mga manghod ni Landero nakit-an nga naghilak ug nagbarog sa baba sa lungag nakit-an kagahapon nga nagsige og singgit og "uli na kuya."

Si PO3 Roselo Campo sa Danao City Police Station nagdumili pagtug-an kun unsa nay kahimtang ni Landero hangtud nga dili kini maugkat gikan sa ilawom.

Matud ni Campo nakadawat sila og tawag gikan sa mga “concerned citizen” alas-nueve kagahapon sa buntag nga nagpahibalo sa maong aksidente, apan dihang ilang giadto ang dapit, ang mga minero miingon nga alas-6 pa nalusno ang minahan.   Ang mga tigbalita misuway sa pagpangayo og pamahayag gikan sa management sa Seri Mining apan ang mga gwardiya wala motugot nga sila makasulod.

Samtang wala ‘say mga opisyal sa Danao City nga mihatag og pamahayag bahin sa aksidente atol ning pagsulat sa balita. - Bryner Diaz, Romeo Limpangog ug AJ dela Torre-Orong sa The Freeman/EIM (BANAT NEWS)