Korean community nangayo’g pasaylo
CEBU, Philippines - Pangulo sa Korean community sa dakbayan sa Lapu-Lapu nangayo og pasaylo kang Mayor Paz Radaza ug sa mga opisyal sa dakbayan tungod sa mga gipangkulit nga "Korean characters" ilawom sa Kontiki Wall sa Brgy. Maribago, dakbayan sa Lapu-Lapu.
Una nang gipangita sa mga awtoridad ang responsable sa pagkulit sa pangalang "RITCHIE" sa usa ka table coral sa Kontiki Wall.
Apan gawas pa diay niini, ang mga divers sa Task Force Kalikasan nakadiskubre usab og mga Korean characters nga sa tan-aw sa mga divers mas nauna pa nga gi-vandal itandi sa “RITCHIE.†Nagtuo sila nga mga Korean divers ang mihimo niini.
Ang presidente sa Korean Travel Group nga si Alex Yong Kee Lee mipaabot ngadto ni Radaza sa ilang mapaubsanong pagpangayo og pasaylo sa gihimo sa ilang mga kababayan.
Matud pa ni Lee motabang ang ilang kahugpongan nga di pasipad-an ang kinaiyahan ilawom sa kadagatan sa isla sa Mactan lakip na ang Kontiki Wall.
Si Lee magbutang og dako nga tarpaulin nga magpasidaan sa mga Koryanong moabot sa tugpahanan sa Mactan nga dili hilabtan ang mga marine life sa Lapu-Lapu ug ang mga Koryanong tinun-an nga nagtungha og English dinhi sa Sugbu giyahan nila daan kabahin sa Philippine Fisheries Law.
Samtang padayon ang pagsusi kung kinsa si "RITCHIE" nga maoy katapusang nagbugalbugal ilawom sa Kontiki Wall ug nahukman ni Radaza nga ikiha sa korte. (BANAT NEWS)
- Latest
